די שטאט הר יונה וואקסט אויף גאר א שנעלן טעמפא, דער געגנט וואס ביז אפאר יאר צוריק איז געווען בלויז א חלום, ווערט פארוואנדלט בליץ שנעל אין א לעבעדיגער געגנט פון היימישע חרדיש'ע משפחות. היינט וואוינען שוין ארום 2,000 משפחות. צוקונפטיגע איינוואוינער אינעם דירות פראיעקט פון חסד לאברהם ווערן שוין יעצט גערופן אויסצוקלייבן און אונטערצושרייבן אויף זייערע דירות, און ביז פסח בעז"ה, וועלן ווערן פארטיג נאך ארום 400 דירות, מיט נאך 3,300 דירות וואס זענען שוין כמעט אינגאנצן אויספארקויפט.
מיטן וואוקס פון דעם היימישן עולם וואקסט אויך די נויט פאר א פאסיגן בית חינוך. און אט דערפאר איז מען אריינגעשפרינגען אין א מאסיווע פראיעקט אויפצובויען א ריזן בנין, א קרית החינוך על טהרת הקודש אין הר יונה. די גראב - ארבעט איז שוין פארענדיגט, אלע יסודות זענען שוין אריינגעגאסן, און דער שטח שטייט גרייט צום ערשטן צעמענט-גיסן. דער פלאן איז, בעזהי"ת, אז אין לויף פון איין יאר זאל דער בנין שטיין פארטיג.
אינעם בנין וועט זיין איינקוואטירט דער תלמוד תורה "ספרא רבא", די מיידל-שולע, די ערשטע קאך (בית התבשיל) און א גרויסע חתונה זאל. די הונדערטער קינדער וואס לערנען היינט אין קאראוואנען און דירות וועלן זיך קענען אריבערציען אין א ברייטן, הערליכן געביידע מיטן אויבערשטנס הילף.
דער בנין שטייט גלייך אנטקעגן כביש 77, דער וועג קיין מירון, וואו טויזנטער אידן פארן אריבער יעדן טאג, און מען זעט עס ווייט פונעם שאסיי. דאס מאכט עס פאר דעם מערסט-געזעענעם בנין אין ארץ ישראל, און דער איינציגסטער בנין וואס ווערט דארט געבויט על טהרת הקודש, אן קיין שום פשרות. אזוי וועט דער בנין שטיין הויך אויף דעם בארג, א געשטאלט פון חינוך הטהור, און א שטאלץ פאר טהרת הקודש.
