א זעלטן געהויבענע שבת איז אריבער אויף אלפי חסידי סקווירא און פילע חסידי מאחנובקא בעלזא, ווען כ"ק אדמו"ר ממאחנובקא בעלזא שליט"א האט מיטגעהאלטן א פולער שבת בצל הקודש פון ידיד נפשו ושאר בשרו כ"ק אדמו"ר ממאחנובקא בעלזא שליט"א, נאך קרוב צו פערציג יאר זינט דער רבי שליט"א האט דאס לעצטע מאל געוויילט אויף שבת אין סקווירא שטעטל.
ווי באקאנט האלט דער רבי שליט"א אן א גאר נאנטע קשר קיין סקווירא, נאך וואס דער רבי שליט"א האט אלס בחור געלערנט אין די ישיבה אין שיכון סקווירא, און איז געווען א בן בית אין שטוב פון הרה"ק מסקווירא זצ"ל. די קשר אמיץ שפיגלט זיך שטארק אפ מיט די נאכאנאנדע ידידות'דיגע באזוכן און השתתפות ביי שמחות צווישן די צוויי הויפן. קורצליך נאך וואס דער רבי שליט"א איז נתעטר געווארן בכתר האדמורו"ת האט ער מיטגעהאלטן א שבת אין סקווירא שטעטל, און מיט עלף יאר צוריק ווען כ"ק אדמו"ר מסקווירא שליט"א האט געפראוועט א גרויסע שבת אין אתרא קדישא מירון, איז דער מאחנובקא בעלזא רבי געקומען מיטהאלטן דעם שבת בצל הקודש.
פארגאנגענע וואך פרשת תולדות האט כ"ק אדמו"ר ממאחנובקא בעלזא שליט"א געלאנדעט אין ניו יארק קומענדיג אויף א געהויבענע באזוך פון א וואך צייט, לרגל די שמחת הברית בבית מקורבו הנאמן הנגיד החסיד ר' חיים יצחק ענגלענדער הי"ו, זון פון הנגיד החסיד ר' פנחס נפתלי ענגלענדער שליט"א, זון פון הנגיד החסיד ר' אלי'ש ענגלענדער שליט"א פון לאנדאן, און איידעם ביי כ"ק אדמו"ר מראפשיץ סטוטשין שליט"א. און צו דעם געלעגנהייט האט דער רבי שליט"א אויסגעדרוקט רצון קדשו צו פארבלייבן אויף שבת אין ניו יארק, און מיטהאלטן א שבת בצל הקודש פון כ"ק אדמו"ר מסקווירא שליט"א.
אין לויף פון די ימי הביקור האט דער רבי אפגעשטאט באזוכן אין אלע שטעט בקרב חסידיו, און געדאווענט די תפילות אין די בתי מדרשים דחסידי מאחנובקא בעלזא אין בארא פארק, וויליאמסבורג, און מאנסי. דער רבי האט באזוכט בבתי האדמורי"ם מטשערנאביל, וויזניץ פון מאנסי, ב"פ און ירושלים, סקווירא מב"פ, ראחמיסטריווקא פון מאנסי, ביי הגה"צ ר' אייזיק שנעעבאלג שליט"א אבד"ק מאחנובקא בעלזא וומס"ב, און נאך. אזוי אויך האט דער רבי באשיינט די שמחת החתונה בחצר הקודש ראחמיסטריווקא, די שמחת השבע ברכות בחצר הקודש באבוב, די שמחת החתונה פון א אייניקל ביי כ"ק אדמו"ר מוויזניץ שליט"א פון לאנדאן, געפראוועט א יארצייט טיש לרגל די הילולא קדישא פון זקינו הרה"ק רבי אברהם יהושע העשיל מסקווירא זי"ע בבית מדרשו אין מאנסי, געפראוועט א מסיבת לחיים אין די נייע ביהמ"ד דחסידי מאחנובקא בעלזא אין ניי וויליאמסבורג, און געפראוועט א מסיבת לחיים אין די נייע לאקאל פון ביהמ"ד מאחנובקא בעלזא אין ב"פ.
אנקומענדיג קיין ניו יארק מאנטאג נאכמיטאג איז דער רבי געווארן אפגעווארט אין לופטפעלד דורך הגה"צ ר' אהרן מענדיל טווערסקי שליט"א, בשליחות הקודש פון אביו הגדול כ"ק אדמו"ר מסקווירא שליט"א. צומארגנס דינסטאג נאכט איז דער רבי אנגעקומען אויף א באזוך צו כ"ק אדמו"ר מסקווירא שליט"א, וואו מען האט פארברענגט א לענגערע צייט מיט גרויס ידידות.
דאנערשטאג נאכט איז דער רבי ווידער אנגעקומען קיין שיכון סקווירא, וואו דער רבי האט געפראוועט א מסיבת לחיים אין ביהמ"ד הגדול לרגל די הילולא קדישא פון זקינו הרה"ק רבי אברהם יהושע העשיל מסקווירא זי"ע, עס האבן זיך באטייליגט א ריזן ציבור חסידים, ובראשם די קינדער פון רבי'ן און די דייני הקהילה. דער רבי שליט"א האט פארציילט סיפורים ועובדות פונעם בעל ההילולא, און דער גאנצער ציבור איז אריבער וואונטשן לחיים און שלום נעמען.
כמנהג סקווירא איז דער רבי שליט"א געגאנגען אנגעטון מיט שטיוול דורכאויס שבת, און האט מיטגעהאלטן אלע תפילות און טישן ביים סקווירא רבי'ן. דער רבי איז מכובד געווארן ביותרת הכבוד ביי די תפילות, און ביי די טישן איז דער רבי געזעסן הארט נעבן דער סקווירא רבי'ן. די סעודות שבת קודש האט דער רבי געגעסן בבית האכסניא ביי הגה"צ ר' אהרן מענדיל טווערסקי שליט"א, וואו עס האבן מיטגעהאלטן דעם רבינ'ס קינדער און די נאנטע מקורבים.
מיט תפלת מנחה פארן עמוד איז מכובד געווארן כ"ק אדמו"ר מליעזש ראדוואן שליט"א, וועלכער איז אויך געווען צוגאסט אויף שבת אין סקווירא לרגל די שידוך שליסן פון א אייניקל, אור אייניקל ביים סקווירא רבי'ן. קבלת שבת האט פארגעדאווענט הגה"צ ר' שלום רוקח שליט"א זון פונעם מאחנובקא בעלזא רבי'ן, און נאכן דאווענען איז דער גאנצער ציבור אריבער וואונטשן א גוט שבת פארן סקווירא רבי'ן, און פארן מאחנובקא בעלזא רבי'ן וואס איז געזעסן הארט דערנעבן אויף א פלאטפארמע.
ביים טיש פרייטאג צונאכטס איז דער רבי מכובד געווארן צו זאגן די שבע ברכות, און מיטן בענטשן איז מכובד געווארן כ"ק אדמו"ר מטאלנא שליט"א פון אשדוד וועלכער האט אויך מיטגעהאלטן דעם שבת אין סקווירא. מיט די אנדערע כיבודים האט מען מכבד געווען די חשובע געסט, הגה"צ ר' יעקב יהושע ענגלענדער שליט"א ראש ישיבת מאחנובקא בעלזא, און הרה"ח ר' ישראל מיללער הי"ו משב"ק כ"ק אדמו"ר ממאחנובקא בעלזא שליט"א. נאך וואס דער סקווירא רבי האט געזאגט תורה ווי יעדע וואך, האט ער מכבד געווען דעם מאחנובקא בעלזא רבי'ן צו זאגן תורה.
מיט תפילת שחרית שבת צופרי איז מכובד געווארן הגה"צ ר' ברוך האלבערשטאם שליט"א איידעם ביים מאחנובקא בעלזא רבי'ן, דער רבי איז מכובד געווארן מיט פתיחה, די עליה פון שלישי, און מיט די כיבוד פון הגבה, וואס איז א זעלטענהייט אז דער סקווירא רבי זאל מכבד זיין איינעם מיט הגבה. שפעטער נאכן מיטאג טיש ביי תפילת מנחה האט דער סקווירא רבי ווידער מכבד געווען דעם מאחנובקא בעלזא רבי'ן צו מאכן הגבה, דאסמאל אויף די ירושה ספר תורה פון הרה"ק רבי אהרן מטשערנאביל זי"ע, שטייענדיג שבת בעפאר די הילולא קדישא.
מוצאי שבת נאך מעריב איז דער מאחנובקא בעלזא רבי אריין אל הקודש פנימה צום סקווירא רבי'ן, וואו די צוויי רבי'ס האבן אינאיינעם געזאגט ויתן לך. שפעטער נאך הבדלה איז דער סקווירא רבי אנגעקומען אויף א ביקור גומלין צום מאחנובקער בעלזא רבי'ן אין שטוב פון בנו הגדול הגה"צ ר' אהרן מענדיל טווערסקי שליט"א, וואו מען האט ווידער פארברענגט א לענגערע צייט, און זיך געזעגנט מיט ברכות לרוב.
אזוי אויך האבן מיטגעהאלטן דעם שיינעם שבת אין סקווירא, א קבוצה אידן פון פאסעיק ניו דזשערזי, חברי קהילת עדת ישראל, אינאיינעם מיט זייער רב הרה"ג ר' פנחס נאוועסעלער שליט"א, נין ונכד לצדיקי בית טשערנאביל.











