הונדערטער חסידי ומעריצי בית סקולען האבן דעם שבת פרשת נשא מיטגעהאלטן א שיינע שבת בחצר הקודש סקולען אין בארא פארק, ווען כ"ק אדמו"ר מסקולען שליט"א פון ירושלים איז געווען צוגאסט אין שטאט, און האט אין א ערשטמאליגע פארנעם געפראוועט א פולער שבת אינאיינעם מיטן פלומעניק כ"ק אדמו"ר מסקולען שליט"א, ממלא מקומו וממשיך דרכו בקודש פון אחיו הגדול כ"ק אדמו"ר מסקולען זצ"ל בעל ישועת יעקב.
דער סקולענער רבי שליט"א פון ירושלים איז געקומען צו פארן קיין ניו יארק לפאר על ראש שמחתו, מיט די געבורט פונעם עלטסטן בן זכר ביים רבינ'ס זון הרב יעקב יוסף פארטוגאל שליט"א, איידעם ביי כ"ק אדמו"ר מחוסט שליט"א פון בארא פארק, די שמחת הברית איז פארגעקומען מאנטאג בהעלותך אין סקולענער בית המדרש אין בארא פארק, און דער רבי שליט"א איז שוין געקומען צו פארן נאך פאר שבת צו באשיינען אויך די שמחת השלום זכר.
אין א ערשטמאליגע פארנעם האט כ"ק אדמו"ר מסקולען שליט"א געפראוועט א שבת אינאיינעם מיט איינער פון זיינע פעטערס כ"ק האדמורי"ם מסקולען שליט"א, ווען דער סקולענער רבי פון ירושלים האט געפראוועט דעם גאנצן שבת אין סקולענער בית המדרש אין בארא פארק אינאיינעם מיטן פלומעניק, במקום שהתפללו אבותיו דארט וואו אביו הגדול כ"ק אדמו"ר הרה"ק בעל מאור ישראל מסקולען זצ"ל האט לאנגע יארן געפראוועט די עבודת הקודש, און דארט וואו דער רבי שליט"א זעלבסט האט משמש געווען ברבנות, בעפארן אננעמען די כתר האדמורו"ת אין ירושלים עיה"ק.
דער סקולענער רבי האט מכבד געווען דעם פעטער דער סקולענער רבי פון ירושלים מיט אלע רעבישע פונקציעס, קבלת שבת און מוסף פארן עמוד און נאך פארשידענע כיבודים. שבת אינדערפרי ביי קריאת התורה איז פארגעקומען א באזונדערע מנין פארן סקולענער רבי'ן פון ירושלים און זיינע באגלייטער, וואו מען האט געליינט די קריאה פון פרשת בהעלותך לויט די סדר הפרשיות אין ארץ ישראל.
ביים טיש פרייטאג צונאכטס במקהלות הונדערטער חסידים ואנשי מעשה האבן ביידע רבי'ס קידוש געמאכט, און אויפגעהויבן דעם כוס צו קידוש איינער פארן אנדערן. דער סקולענער רבי פון ירושלים האט גענומען שיריים פונעם פלומעניק דער סקולענער רבי מיט א זעלטענע פשטות און ענוות חן, ביידע רבי'ס האבן געזאגט תורה, און מען האט פארברענגט לענגערע שעות בשירות ותשבחות אויפן סקולענער שטייגער.
ביים קידוש און שלש סעודות אין שפיץ פון ביידע רבי'ס האבן זיך ווידער אנגעזעהן א שיינער ציבור חסידים, די שבת האט זיך געשלאסן מיטן נאסטאלגישן סקולענער הבדלה, און דער סקולענער רבי פון ירושלים האט זיך הארציג באדאנקט פארן פלומעניק דער סקולענער רבי פאר די ווארעמע אויפנאמע.
