מיט גרויס צער ווערט אויפגענומען די שווערע בשורה איבער די פטירה בשיבה טובה פון כ"ק אדמו"ר מסטרעליסק, הרה"צ רבי יעקב שלמה קלוגהופט זצ"ל, מזקני האדמורי"ם והרבנים אין שטאט בארא פארק, וועלכער איז נפטר געווארן דעם פרייטאג צונאכטס אין עלטער פון פיר און ניינציג יאר.
דער רבי זצ"ל איז געווען דער איינציגסטער זון און ממלא מקום פון כ"ק אדמו"ר הרה"ק ר' לוי יצחק מסטרעליסק זצ"ל, איתן מושבו בעיר הבירה לאנדאן, וועלכער האט געצויגן א הערליכע יחוס צו פילע צדיקים וקדושים מנהיגי החסידות פון די פריערדיגע דורות. דער רבי איז געווען אן איידעם ביי הרב החסיד ר' מענדל שעכטער ז"ל מיקירי קרתא דשופריא, און האט אוועקגעשטעלט זיין שיינעם שטוב אין שטאט בארא פארק לשם ולתפארת.
דער רבי זצ"ל איז געווען אן אוד מוצל מאש, געבוירן אין דער אלטער היים אין שטאט סטרעליסק, שפעטער האט ער געוואוינט אין שטאט וויען און מיטגעמאכט די ביטערע מלחמה צייטן, ער איז געווען באקאנט מיט זיין גדלות בתורה און פשטות, שטענדיג געווען בהצנע לכת און געדינט דעם אויבערשטן ווייט פון יעדנס אויג.
דער רבי זצ"ל איז געווען א שוואגער מיט להבחל"ח כ"ק אדמו"ר מקאלוב שליט"א, און הרה"צ ר' וועלוויל טווערסקי זצ"ל מראחמיסטריווקא, וועלכע זענען געווען איידימער פון זיין פאטער כ"ק אדמו"ר הרה"ק ר' לוי יצחק מסטרעליסק זצ"ל.
דעם שבת קודש י' אייר האט נאך דער רבי קידוש געמאכט פרייטאג צונאכטס, טראץ וואס ער איז געווען היבש אפגעשוואכט די לעצטערע יארן, שפעטער ביינאכט האט דער רבי פלוצלינג צוריקגעגעבן זיין ריינע נשמה ליוצרה, איבערלאזנדיג א הערליכע דור, גאר חשובע קינדער און אייניקלעך, בנין וחתנין רבנן.
די קינדער פון רבי'ן זענען הרה"צ ר' דוד לייב קלוגהופט שליט"א אבד"ק סטרעליסק, איידעם ביי כ"ק אדמו"ר הרה"ק מסקולען זי"ע, הרה"צ ר' אפרים מרדכי קלוגהופט שליט"א, איידעם ביי כ"ק אדמו"ר מקאסאן זצ"ל, הרה"צ ר' יחיאל מיכל קלוגהופט שליט"א, און הרה"צ ר' חיים מאיר קלוגהופט שליט"א, איידעם ביי הגה"צ גאב"ד מעזבוזש שליט"א, די איידימער פונעם רבי'ן זצ"ל זענען כ"ק אדמו"ר מראחמיסטריווקא לעיקוואד שליט"א, כ"ק אדמו"ר מסאטינוב שליט"א, הרה"צ ר' פנחס שלום ראטטענבערג שליט"א מקאסאני, און הרה"צ ר' שלום פסח גרינבערג שליט"א בן הגה"צ אבד"ק פאלייענא שליט"א.
די מסע הלוויה וועט פארקומען מארגן זונטאג האלב נאך עלף פארמיטאג ביי די באיאן קלויז אין בארא פארק, אויפן וועג קיין ארץ ישראל וואו ער וועט געברענגט ווערן למנוחת עולמים נעבן זיין גרויסן פאטער.
זכר צדיק לברכה לחיי העולם הבא.
