די הימלען וויינען, די וועלט איז פאריתומ'ט, הצדיק אבד לדורו אבד.
א לעבן פון צדקות ופרישות, א לעבן פון תורה וחסידות, א לעבן פון אהבת ישראל, א לעבן פון עבודת השם, א לעבן פון טון פאר אידנ'ס וועגן, די הייליגע לעבן איז געקומען צו אן ענדע, די ליכט האט זיך פארלאשן בטרם עת, און די חלל וואס באטרעפט די גאנצע וועלט איז שרעקליך און שוידערליך.
ויהי ימי יעקב
דער רבי זכר צדיק לברכה איז געבוירן געווארן כ"ו אדר תשט"ז, אלס עלטסטע זון צו זיין גרויסן טאטן הרה"ק בעל מאור ישראל מסקולען זי"ע, דער רבי איז געבוירן נאך אין שטאט בוקארעסט אין ראמעניע אונטער די קאמוניסטישע נעגל, די הייליגע סקולענע צדיקים האבן דארט געוואוינט און מיטגעמאכט זייער שווערע צייטן ווי באקאנט, ביז תשי"ט ווען דער רבי איז אלט געווען בלויז דריי יאר, ווען זיי זענען ארויסגעקומען קיין אמעריקע און זיך באזעצט אין קראון הייטס.
על ברכי זקינו הגדול הרה"ק בעל נועם אליעזר זי"ע איז דער רבי נתגדל געווארן און געשעפט פון דעם רייכן קוואל, געלערנט און געזעהן וויאזוי א ערליכע איד פירט זיך, מיט ריינע כוונות בלויז לשם שמים, מקיים זיין זיינע מצוות און לערנען זיין הייליגע תורה. דער זיידע הרה"ק מסקולען האט שטארק געגליכן דעם רבי'ן און משפיע געווען אויף אים כמים פנים לפנים, אלע יארן האט דער רבי געקאכט במשנתו פון זיין גרויסן זיידן, און געהאלטן זיין הייליגע צורה פארנט פון זיינע אויגן צו יעדע צייט.
דער רבי האט געלערנט אין די סאטמארע חדר און דערנאך אין די סאטמארע ישיבה, זייענדיג א תלמיד בישיבתו של רבי ביי הרה"ק מסאטמאר זי"ע. אויף דעם דרך איז דער רבי אויפגעוואקסן און זיך פאררעכנט אלע יארן אלס סאטמארער תלמיד און חסיד.
אין די שפעטערע יארן איז דער רבי געפארן לערנען קיין ארץ ישראל אין די בארימטע ישיבה תפארת ישראל רוזין, דארט האט דער רבי געלערנט מיט א צאל גדולי האדמורי"ם פונעם היינטיגן דור, און געשטיגן אין לערנען בתורה וחסידות.
דער רבי איז געווען א עובד השם מנעוריו, געדינט דעם אויבערשטן אן קיין שום פשרות, געריסן שטיקער נאך פון יונגווייז אן, לעבענדיג א העכערע לעבן בדרך העבודה בקדושה ובטהרה. דער רבי איז געזעסן און געלערנט לאנגע שעות און זיך מקדש געווען בקדושה של מעלה, צובראכן די עולם הזה און עס נישט געוואלט קענען.
בהגיעו לפירקו איז דער רבי געווארן אן איידעם ביי הגה"צ ר' מאיר גרינוואלד זצ"ל אבד"ק טעטש, ביי וועם להבחל"ח כ"ק אדמו"ר מפאפא שליט"א איז אויך אן איידעם, א זון פון הגה"צ ר' אברהם יוסף גרינוואלד זצ"ל אבד"ק אונגוואר, בנו הגדול פון מרנא ורבנא כ"ק הגה"ק בעל ערוגת הבושם זי"ע.
זיין שווער דער טעטשער רב זצ"ל האט שוין דאן נישט געלעבט, און אין שטוב פונעם שטיף שווער הגה"צ ר' יצחק אייזיק מאשקאוויטש זצ"ל רב וראש ישיבת מאור הגולה אין מאנטריאל איז דער רבי געווען א באליבטער איידעם. נאכן פטירה פון זיין שווער הגה"צ אב"ד מאור הגולה זצ"ל, איז דער רבי זצ"ל געווארן אויפגענומען למלא מקומו בקודש, און זינט דאן משמש געווען אלס רב ואב"ד אין קהל מאור הגולה אין מאנטריאל, וואס בליהט און שיינט ביזן היינטיגן טאג.
פעולות צדיק לחיים
דער רבי איז אנגעגאנגען מיט זיין עבודה בהצנע לכת און מסירת נפש, טראץ וואס ער האט געהאט א שוואכע גוף האט ער געמאנט פון זיך אסאך, געשניטן שטיקער למען כבוד שמו יתברך, און געדינט דעם אויבערשטן מיט העכערע כוחות, ווען צו די זעלבע צייט איז דער רבי משפיע לארץ ולדרים, באגיסנדיג הויפענעס חיזוק פאר יעדער וואס האט נאר איבערגעטרעטן דעם שוועל פון טיר.
ביים רבי'ן אין צימער האט יעדע איד געטראפן א געשמאקע ווינקל וואו צו שטייגן, יעדער איד האט געטראפן אפענע אויערן צו וועם זיך אויסצורעדן א שווער הארץ, צובראכענע זענען ארויס געהאלפענע, מיט אן אמת'ע אהבת ישראל און ליבליכקייט, מיט א אמת'ע שמייכל און אינטערעסע.
רבים נושעו מברכותיו, דער רבי איז געווען א יודע טיב לברך, געבענטשט אידישע קינדער מיט ברכות לרוב, און דערמיט אויפגעהויבן אידישע קינדער צו א העכערע דרגא, טויזענטער האבן זיך געקלאמערט ביי זיין טיר צו ערהאלטן א ברכת צדיק, און ווייזן פאר די קינדער די צורה פון א פארצייטישער צדיק.
מיט צוועלף יאר צוריק האט דער רבי מיטגעמאכט זייער א שווערע דורכגאנג, נאך וואס מען האט געדארפט אדורכפירן א לעבער טראנספלאנט, די נאמען "ישעי' יעקב בן רייזל" איז שוין דאן באקאנט געווארן איבער די גאנצע וועלט, ווען אידישע קינדער האבן איינגעריסן לרפואתו פאר לאנגע חדשים נאכאנאנד.
מיט פינף און א האלב יאר צוריק נאכן הסתלקות פון אביו הגדול, איז דער רבי נתעטר געווארן בכתר האדמורו"ת, און גערופן געווארן למלא מקומו בקודש באדמורו"ת סקולען, דער רבי האט זיך דאן אריבערגעצויגן פון מאנטריאל קיין בארא פארק צו משפיע זיין פונדערנאנט פאר קהל עדת צאן מרעיתו, און אין די זעלבע צייט אנגעהאלטן א ווייטערדיגע קשר מיט קהל עדתו און חסידיו אין מאנטריאל, תחת דגלו והדרכתו פונעם רבינ'ס איידעם הגה"צ ר' יואל מאסקאוויטש שליט"א וועם דער רבי האט געשטעלט אלס רב אין מאור הגולה.
די תפילות און טישן ביים רבי'ן איז געווען א שם דבר וואו אידישע קינדער האבן זיך געווייקט לאורו הגדול, די מלוה מלכה'ס עד אור הבוקר, די קוויטלעך און פראווענען מיט א ליבליכקייט, מ'קען רעדן און רעדן, שרייבן און שרייבן, און קיינמאל נישט פערטיג ווערן.
די לעכטיגע תורות פונעם רבי'ן האט אריינגעשיינט אין טויזענטער אידישע הערצער, די ווארעמע דרשות און שמועסן, מלא וגדוש מיט דברי חיזוק און אמונה, וצדיק באמונתו יחיה האט מען באשיינפערליך געזעהן אויף דעם הייליגן צורה, א איד וואס האט געלעבט בלויז מיטן אויבערשטן, נישט געוואוסט גארנישט אויסער טון די רצון השם.
יעדע יום טוב צו יומא דפגרא האבן הונדערטער צו גאר טויזענטער אידן באלאגערט דעם רבינ'ס טיר, לשמוע אל הרנה ואל התפלה ולהתברך מברכותיו הטהורות. די קהילה פלעגט ארויסדינגען גרעסערע זאלן און בתי מדרשים צו קענען אקאמאדירן דעם גרויסן ציבור, סיי ביי די תפילות ימים הנוראים, און סיי ביי די לעכטיגע הקפות שמחת תורה און דאס גלייכן.
בדרך אבותיו הקדושים האט דער רבי געלייסטעט צו העלפן אידישע קינדער, און ווייטער ממשיך געווען צו פירן די הייליגע מוסדות "חסד לאברהם", אויף וואס זיין גרויסן זיידן און זיין גרויסן פאטער האבן זיך מוסר נפש געווען בדם לבבם, דער רבי האט ווייטער געטראגן דעם עול, זיך געמוטשעט און געארבעט אז די הייליגע מוסדות זאל ווייטער אנגיין, שלא יכבה נרם לעולם ועד.
ויעקב הלך לדרכו
ליידער האט זיך דאס רייכע לעבן געשלאסן פריהצייטיג, נאך וואס דער רבי איז אריבער שרעקליכע יסורים ומכאובים, מיט זייער שוואכע לונגען אין די לעצטע פאר יאר, איבערהויפט אין די לעצטערע חדשים ווען דעם רבינ'ס לונגען האט ממש נישט פונקציאנירט, און טראץ די פרואוון ארויסצוהעלפן מיט א טרעיק האט עס ליידער נישט עושה רושם געווען, די גזר דין איז געווען פארשריבן, און דער רבי איז נתבקש געווארן לישיבה של מעלה.
דער רבי זצ"ל לאזט איבער א חשובע דור, געהויבענע קינדער ממשיכי דרכו בקודש, די צוויי זיהן הגה"צ ר' אהרן מאיר שליט"א איידעם ביים רבינ'ס שוואגער הגה"צ ר' שלמה אליעזר ברוינשטיין שליט"א אבד"ק טערניווא, און הגה"צ ר' אליעזר זוסיא שליט"א איידעם ביי כ"ק אדמו"ר מטשערנאביל שליט"א.
די איידימער פון רבי'ן זענען הגה"צ ר' מרדכי דוב בעק שליט"א אב"ד טאלמיטש, הגה"צ ר' יואל מאסקאוויטש שליט"א אב"ד מאור הגולה, הגה"צ ר' יוסף משה אונסדארפער שליט"א ר"ם בישיבה גדולה אור החיים ד'טאהש, הגה"צ ר' מנחם נחום טווערסקי שליט"א מרביץ תורה אין ביהמ"ד סקולען, הגה"צ ר' דוד פריעדמאן שליט"א ראה"כ סקולען וומס"ב, און הגה"צ ר' מנחם מענדיל בריעף שליט"א ראה"כ סקולען ב"פ.
צו דעם לאזט דער רבי איבער די חשובע געשוויסטער, בני וחתני הרה"ק מסקולען זי"ע, די ברידער כ"ק האדמורי"ם מסקולען פון וויליאמסבורג, מאנסי, לעיקוואד, און ירושלים, די שוואגערס הגה"צ ר' בערל שטערן שליט"א אבד"ק סקולען ב"ב, הגה"צ ר' שמעון יואל וויינבערגער שליט"א אבד"ק וויטקא, און הגה"צ ר' דוד לייב קלוגהופט שליט"א אדמו"ר מסטרעליסק.
זכר צדיק לברכה לחיי העולם הבא.
