ערשטע באריכטן זענען היינט באשטעטיגט געווארן דורך די גדולי הדור בארץ הקודש, איבער א געפלאנטע היסטארישע נסיעה וואס א צאל גדולי ישראל וועלן אונטערנעמען בטירחא דגברא רבא ארויסצופארן קיין חוץ לארץ, מיטן איין איינציגן ציהל צו מחזק זיין די עולם התורה בארץ הקודש, נאך די שרעקליכע פינאנציעלע צושטאנד וואס האט באטראפן די ישיבות און כוללים מיט די פרישע גזירה פון גיוס בני הישיבות.
ווי באקאנט האט די מדינת ישראל רעגירונג געמאלדן אז זיי טוען אפהאקן פינאנציעלע שטיצע פאר די ישיבות און כוללים, אויב די תלמידים שטעלן זיך נישט אין מיליטער לויט זייער פארלאנג, דאס האט געברענגט א שטייפע רעאקציע פון די גדולי הדור ראשי הישיבות וועלכע האבן אלע אייניג געמאלדן אז זיי וועלן טון וואס מעגליך צו אויפברענגען פרישע שטיצע פאר די עולם התורה, ווען די אפציע זיך צוצושטעלן צו די ציוניסטישע פארלאנגען קומט ניטאמאל אין באטראכט.
נאך לענגערע אפהאנדלונגען און פילע פלענער, איז היינט באשטעטיגט געווארן אז א צאל גדולי הדור וועלן אפרייזן אויף א היסטארישע מסע הצלה קיין חוץ לארץ, מיטן ציהל צו אויפטרייבן מיליאנען דאללארן להחזקת התורה בארצינו הקדושה, עס וועלן קומען צו פארן דער זקן גאוני הדור מרן הגאון הגדול רבי דוב לאנדא שליט"א ראש ישיבת סלאבאדקע, כ"ק אדמו"ר מראחמיסטריווקא שליט"א, הגאון הגדול המשגיח רבי דן סגל שליט"א, הגאון הגדול רבי יעקב הלל שליט"א ראש ישיבת המקובלים אהבת שלום, ואתם עמם מרן הגאון הגדול רבי משה הלל הירש שליט"א ראש ישיבת סלאבאדקע, וועלכער געפונט זיך שוין אצינד אין אמעריקע פונעם גרויסן מעמד אדירי התורה.
די גדולי הדור זענען ערווארטעט צו לאנדן אין ניו יארק דעם קומענדיגן זונטאג, מיט א מעגליכקייט אז נאך רבי'ס, רבנים, און ראשי ישיבות, וועלן זיך אנשליסן אין די היסטארישע נסיעה, דורכאויס די באזוך אין אמעריקע וועט פארקומען רייכע באנקעטן און ספעציעלע מסיבות בבתי נגידים ושועים, מיטן האפענונג צו אויפטרייבן צענדליגע מיליאנען להחזקת עולם התורה.
