א דריגענדע אסיפה איז אפגעהאלטן געווארן נעכטן מיטוואך בעיר הקודש ירושלים, ווען די זקני גדולי רבני ברסלב זענען זיך צוזאמגעקומען אויסצושמועסן די דריגענדע נושא פון גזירת גיוס בני הישיבות, אין די צייט וואס מען שטייט שוין ווייניגער ווי א חודש בעפאר ראש השנה, ווען טויזענטער חסידי ברסלב פארן אין די מאסן קיין אומאן, צום ציון הק' פון הרה"ק רבי נחמן מברסלב זי"ע.
יעדער ברסלבער חסיד לעכצט און בענקט ארויסצופארן קיין אומאן אויף ראש השנה, אבער מיט די יעצטיגע פארשארפערטע גזירה איז עס פאר א גרויסע ציבור ברסלבער חסידים ביטער שווער, ווען די מדינת ישראל אינסטאנצן באדראען צו ארעסטירן בחורים און אינגעלייט פארן זיך נישט שטעלן צום מיליטער, און ביים דורכגיין די גרעניץ אין לופטפעלד איז עס די גרינגסטע וועג צו ווערן ארעסטירט.
ליידער האבן די רשעי ישראל ארויפגעלייגט דעם שווערן גזירה נישט געבנדיג קיין אויסוואל זיך ארויסצודרייען פון גיין דינען אין מיליטער, א שריט וואס איז אסור לויט אלע גדולי הדור, און אז מען פרובירט ארויסצופארן פון לאנד שטייט מען אויס א געפאר צו ווערן ארעסטירט, און אונטערגיין נאך פארשידענע סאנקציעס וואס איז זייער שווער פאר יעדן איינעם.
טראץ וואס עס האט אויסגעזעהן אז מען וועט קענען אויספועל'ן ביי די אינסטאנצן אז זיי זאלן עפענען די גרעניצן פאר איין וואך, צו ערמעגליכן פאר ברסלבער חסידים צו פארן רואיגערהייט קיין אומאן, זעט נישט אויס דערווייל ווי די פרואוון זאלן מצליח זיין, און דעריבער זענען די גדולי רבני ברסלב זיך צוזאמגעקומען אויף א דריגענדע אסיפה כדת מה לעשות.
נאך א לענגערע דין ודברים איז ערשינען א קלארע הוראה, אונטערגעשריבן דורך די זקני מנהיגי ברסלב, הגה"צ רבי יעקב מאיר שעכטער שליט"א, הגה"צ רבי שמואל משה קרעמער שליט"א, און הגה"צ ר' נתן ליבערמנש שליט"א. אינעם בריוו ברענגען זיי ארויס די גרויסקייט פון פארן קיין אומאן, אבער אין די זעלבע צייט ברענגען זיי ארויס די שווערע צייט וואס הערשט אויף אחינו בני ישראל, און אז עס איז נישטא קיין שום היתר זיך אריינצולייגן א סכנה פון ארעסטירט ווערן, אפילו אויף אזא וויכטיגע זאך פון פארן קיין אומאן.
די רבנים פירן אויס אז די הוראת שעה איז אז ווער עס איז אונטער אן ארעסט באפעל פארן זיך נישט שטעלן אין מיליטער, זאל אויף קיין שום פאל נישט פרובירן ארויסצוגיין פון לאנד, און ווער עס טוט דאס יא איז א פורץ גדר ח"ו. דערביי רופן די גדולים צו די משפיעים נישט צו ערלויבן די יונגע חסידים אריינצוגיין אין א מכשול, און בקרוב ממש זאל די גזירה בטל ווערן בעז"ה.
