אין בעפארברייטונג צו די געהויבענע מסע הקודש וואס כ"ק אדמו"ר מלעלוב שליט"א נעמט אונטער קיין פוילין אין צוויי וואכן ארום, איז היינט געמאלדן געווארן די הוראת הקודש פונעם רבי'ן שליט"א פאר אלע חסידים, אז די וואס קענען מעגליך ווערן ארעסטירט אין לופטפעלד צוליב די גזירת הגיוס, זאלן בשום אופן נישט מיטקומען אויף די נסיעה.
יאר יערליך פארט דער רבי שליט"א ארויס אינאיינעם מיט הונדערטער חסידים קיין פוילין, צום יומא דהילולא קדישא פון הרה"ק רבי דוד'ל לעלובער זי"ע ביום ז' שבט, ווען די גאנצע יומא דהילולא ווערט אפגעראכטן מיט גרויס התעוררות, די תפילות און מעמד ההדלקה כנהוג, די עלי' לציון און די צענטראלע יארצייט טיש אין א גרויסע שאטער.
הונדערטער חסידים פארן כסדר מיט אויף די נסיעה, און אצינד איז אונטערגעקומען די פראגע, ווען די מדינת ישראל אינסטאנצן טוען ליידער אינפארסירן די שרעקליכע גזירה פון גיוס, און ארעסטירן די וואס זיי האלטן אז זיי דארפן זיך שטעלן אין מיליטער, וואס איז ווי פארשטענדליך גע'אסר'ט דורך די גדולי ישראל אין אלע דורות.
אצינד האט דער רבי איבערגעגעבן די הוראת הקודש אז סיי וועלכע חסיד, א בחור אדער א אינגערמאן, וואס עס איז פארהאן א חשש אז מען וועט אים ארעסטירן ביים אויפדעקן זיין אידענטיטעט וועלנדיג ארויספארן פון לאנד אדער צוריק אריינקומען, זאל בשום אופן נישט מיטקומען אויף די נסיעה, און די זכות פונעם הייליגן בעל ההילולא דער אוהבן של ישראל הרה"ק רבי דוד'ל לעלובער זי"ע, וועט זיכער פועל זיין מ'זאל קענען אויספועל'ן ישועות פון וואו מען געפונט זיך.
