יעצט אויפדערנאכט אין ארץ ישראל איז פארגעקומען א דריגענדע אסיפה אין ירושלים עיה"ק, וואו עס האבן זיך צוזאמגענומען צענדליגע אדמורי"ם ורבנים וראשי ישיבות, צו דורכשמועסן די ברענענדיגע נושא פון די גזירת הגיוס בארץ הקודש, און אוועקשטעלן א פעלזן פעסטע שטעלונג קעגן די חוק הגיוס וואס ווערט באטראכט אין די יעצטיגע טעג.
ביים אסיפה וואס איז פארגעקומען אין די וויזניצע זאל אויף רחוב נחמיה אין ירושלים, האבן זיך באטייליגט צווישן אנדערע כ"ק האדמורי"ם מסלאנים, ראחמיסטריווקא, טשערנאביל, לעלוב, וויזניץ פון בית שמש, בוהוש, פינסק קארלין, זוועהיל, שבט הלוי, ביאלא בני ברק, לוצק, סאסוב, סקולען פון ירושלים, חוג חתם סופר, הגה"צ ר' יעקב מאיר שעכטער שליט"א, הגה"צ ר' יצחק מאיר מארגענשטערן שליט"א אדמו"ר מתורת חכם, הגה"צ ר' צבי מאיר זילבערבערג שליט"א ראש חבורת נחלת יעקב, הגאון הגדול רבי משה צדקה שליט"א ראש ישיבת פורת יוסף, און נאך פילע רבנים וראשי ישיבות.
צווישן אנדערע איז געווארן אויסגעשמועסט די חוק הגיוס וואס ליגט אויפן טיש, און די געוואלדיגע קעגנערשאפט וואס מען דארף האבן דערצו, נישט צו מאכן קיין שום פשרות ווען עס קומט צו אידישע נשמות, און די געוואלדיגע סכנה וואס הערשט פון גיין אין מיליטער. אזוי אויך איז אויפגעברענגט געווארן די פלאן צו ארגענעזירן א גרויסע עצרת די קומענדיגע וואך ברחובה של עיר.
