מיט גרויס צער ווערט אצינד אויפגענומען די שווערע בשורה איבער די הסתלקות פון כ"ק אדמו"ר מזידטשויב שיקאגא, הרה"צ רבי יהושע העשיל אייכענשטיין זכר צדיק לברכה, וועלכער איז יעצט נאכמיטאג נפטר געווארן לחיי העולם הבא, אין עלטער פון 81 יאר.
דער רבי זצ"ל איז געווען בנו יחידו וחביבו פון כ"ק אדמו"ר רבי אברהם אייכענשטיין זצ"ל מזידטשויב שיקאגא, א זון פון הרה"ק רבי יהושע העשיל זי"ע, א אייניקל בן אחר בן פון הרה"ק רבי אייזיק'ל זידטשויב זי"ע, נצר לקדושי עליון פילע תלמידי בעשטה"ק און מנהיגי ישראל בדורות הקודמים.
ער איז אויפגעוואקסן בצל הקודש פון זיין טאטן אין שיקאגא, וואו ער האט צוגעזעהן פונדערנאנט די עבודת הקודש פון פארשפרייטן אידישקייט נאנט און ווייט. נאכן הסתלקות פון זיין פאטער דער רבי זצ"ל איז ער אויפגענומען געווארן אלס ממלא מקום און ממשיך געווען די עבודת הקודש, ער איז געווען אן איידעם ביי הגה"צ ר' אברהם דוד הורוויץ זצ"ל אבד"ק שטראסבורג וחבר ביד"ץ העדה החרדית.
יארן לאנג האט דער רבי משפיע געווען מהודו והדרו אויף די גאנצע שטאט, און פאר די פילע אידן וואס האבן זיך געקלאמערט לאורו הגדול, ליידער אין די לעצטערע יארן איז ער געווען נישט געזונט, והוא מחולל מפשעינו. יעצט נאכמיטאג איז דער רבי נפטר געווארן לחיי העולם הבא, לדאבון לב חסידיו ומעריציו ומשפחתו היקרה, און די גאנצע אידישע געמיינדע אין שטאט שיקאגא.
דער רבי זצ"ל לאזט איבער א הערליכע דור בליעה"ר, פיר חשובע זיהן הגה"צ ר' פנחס שלום אייכענשטיין שליט"א אב"ד חודרוב שיקאגא, הגה"צ ר' יחזקאל אייכענשטיין שליט"א אב"ד זידטשויב מארין פארק, הגה"צ ר' ישכר דוב אייכענשטיין שליט"א אב"ד זידטשויב באלטימאר, און הגה"צ ר' זלמן לייב אייכענשטיין שליט"א רב הצעיר דקהל זידטשויב אין שיקאגא. די דריי איידימער הגה"צ ר' חיים מאיר ארנסטר שליט"א אב"ד וויזניץ מאנטשעסטער, הגה"צ ר' שלמה פרענקל שליט"א אב"ד וויעליפאלי לעיקוואד, און הגה"צ ר' מאיר יצחק הורוויץ שליט"א אב"ד לינסק ב"פ.
דער רבי האט זוכה געווען זיך משדך צו זיין מיט פילע גדולי האדמורי"ם ברחבי תבל, צווישן זיי האדמורי"ם מבאיאן, סקווירא, סאטמאר, באבוב 45, תולדות אהרן, וויזניץ מאנסי, וויזניץ ירושלים, ראחמיסטריווקא, וויען, סקולען מאנסי, ערלוי, דינוב, קאלוב, נייטרא, פארשעי, און נאך חשובע רבנים ואדמורי"ם.
