מיט שטורמישע בכיות און יאמערליכע טרערן זענען אלופי אלפי ישראל ארויסגעקומען ברחובות העיר בארא פארק, אפצוגעבן דעם כבוד האחרון פארן גדול הדור דער פאר והדר פון עיר התורה והחסידות בארא פארק, דער עמוד צלותהון דישראל ומלהיב לבן בשלהבת אש קודש רבות בשנים, כ"ק אדמו"ר הרה"ק מקאסוב זצוק"ל.
ארום האלב נאך אכט איז די מיטה אנגעקומען צום וויזניצע בית המדרש אויף דריי און פופציג ביי נוא יוטרעקט, דארט וואו דער רבי זצ"ל האט משמש געווען אלס דיין לאנגע יארן, מען האט אפגעראכטן די טהרה אין די מקוה בבנין ביהמ"ד, און דערנאך אריבערגעפירט די מיטה אקעגן איבער, לביתו נאוה קודש פונעם רבי'ן זצ"ל, אין די ספרים שטוב צווישן די פיר ווענט וואו דער רבי האט עוסק געווען בתורה והוראה רבות בשנים, משם יצא הוראה לישראל, פון דארט האבן טויזענטער אידן געשעפט חיזוק ברוחניות ובגשמיות, אין די ד' אמות של הלכה וואו טויזענטער שאלות זענען גע'פסק'נט געווארן ביי דעם גדול הדור.
דערנאך איז די מיטה געפירט געווארן ברחובות העיר ביז ביהמ"ד קאסוב זאליטשיק אויף די צוויי און פופציגסטע סטריט צווישן די עלפטע און צוועלפטע עוועניוס, דארט וואו דער רבי זצ"ל האט געפראוועט די עבודת הקודש בשנים קדמוניות, בבית מדרשו של אביו הרה"ק רבי אברהם יהושע העשיל מקאסוב זאליטשיק זצ"ל. מען האט נישט אריינגענומען די מיטה אינעווייניג, נאר פארנט פון ביהמ"ד האט הרה"ח ר' מענדיל ראזענבערג הי"ו יו"ר החברא קדישא און חסד של אמת פארגעזאגט קל מלא רחמים.
ארום א פערטל פאר עלף האט מען אריינגעברענגט די מיטה אין קאסובער בית המדרש, וואו הונדערטער אידן זענען געשטאנען פארזאמלט מיט פארוויינטע אויגן און געזאגט פרקי תהלים בהתעוררות רב. דערנאך האט מען אפגעראכטן די הקפות כנהוג דורך די חשובי העדה אדמורי"ם און רבנים, באגלייט מיט יאמערליכע בכיות דורך די הונדערטער פארזאמלטע אין ביהמ"ד און די טויזענטער אויף די גאסן ארום, פארגעזאגט דורך הרה"ח ר' מענדיל ראזענבערג הי"ו יו"ר החברא קדישא און חסד של אמת, פון די נאנטע מקורבים ביים רבי'ן זצ"ל.
נאך די הקפות האט אויפגעטרעטן מיט רירנדע דברי פרידה, הגה"צ ר' חיים האגער שליט"א אבד"ק זאליטשיק איינציגער ברודער פונעם רבי'ן זצ"ל, הימל שפאלטענדע בכיות האט איבערגענומען די גאנצע חלל הביהמ"ד און די גאסן ארום, ווען דעם רבינ'ס ברודער הגה"צ אבד"ק זאליטשיק שליט"א האט אויסגעשריגן "כ'זוך די עוונות און כ'טרעף עס נישט", מ'האט יעצט געזאגט די נוסח פון הקפות וואו מ'בעט דעם אויבערשטן ער זאל מכפר זיין אויף די עוונות פונעם נפטר, כ'גיי ארום די מיטה און כ'זוך די עוונות! נאר זכותים טרעפט מען, אהבה וחיבה צו יעדע אידיש קינד, און התמדה בתורה שעות אויף שעות.
דערנאך האט אויפגעטרעטן דער לאנגיעריגער ראש הקהל אין קהילה קדושה קאסוב הנגיד החסיד ר' שלמה זלמן קליין הי"ו איש אמונו פונעם רבי'ן זצ"ל, און בשם די קהילה האט ער מכתיר געווען די צוויי עלטסטע קינדער פונעם רבי'ן זצ"ל אלס ממשיכי דרכו בקודש, בנו הגדול הגה"צ ר' יעקב שמשון האגער שליט"א אדמו"ר מקאסוב, און דער צווייטער זון הגה"צ ר' מנחם מענדיל דוד האגער שליט"א (איידעם ביי כ"ק אדמו"ר מסערט וויזניץ שליט"א).
דערנאך האט כ"ק אדמו"ר מקאסוב הרה"צ רבי יעקב שמשון האגער שליט"א אויפגעטרעטן מיט רירנדע ווערטער, און צווישן די הייסע בכיות געבעטן פון זיין יונגערער ברודער כ"ק אדמו"ר מקאסוב הרה"צ רבי מנחם מענדיל דוד שליט"א אז ער זאל קומען קיין אמעריקע איבערנעמען די כתר האדמורו"ת, און ווייטער ממשיך זיין די הייליגע המשכה לבית קאסוב. אזוי אויך האט ער געבעטן אז די יונגערע ברידער זאלן אויך ממשיך זיין די כתר ההנהגה, הגה"צ ר' משה האגער שליט"א אלס מנהיג אין וויליאמסבורג, און הגה"צ ר' ברוך האגער שליט"א אלס מנהיג אין לעיקוואד.
דערנאך האט הרה"ח ר' מענדיל ראזענבערג הי"ו יו"ר החברא קדישא פארגעזאגט קל מלא רחמים, און אויסגערופן אז אלע תלמידים וחסידים זאלן רייסן קריעה אויף די רעכטע זייט כדת וכדין, אין די זעלבע צייט האבן די קינדער האדמורי"ם והרבנים האבן געריסן קריעה. דאן האט מען ארויסגעברענגט די מיטה פון ביהמ"ד, וואו טויזענטער אידן האבן אפגעווארט און באגלייט די מיטה אראפ די פינף און פופציגסטע סטריט ביז די צוועלפטע עוועניו.
צווישן די פילע משתתפים האבן זיך אנגעזעהן כ"ק האדמורי"ם מסאטמאר, באבוב, באבוב 45, צאנז קלויזענבורג, טשערנאביל, סקולען, ראחמיסטריווקא, מונקאטש, וויזניץ פון וומס"ב, וויזניץ פון ירושלים, וויזניץ פון ב"פ, בית חיים יהושע, קאסאן, דינוב, לעלוב, ספינקא, סערדאהעלי, סקווירא ב"פ, תולדות צבי ספינקא, בית שמואל צבי ספינקא, בורשטין, סטוטשין, תולדות יהודה סטוטשין, ראחמיסטריווקא וומס"ב, זידטשויב ב"ב, בלאזוב, דאמבראווא, וויען ב"פ, הגה"צ גאב"ד טענקא, הגה"צ אבד"ק באבוב 45, הגה"צ ר' אהרן שיף גאב"ד אנטווערפן, און הגה"צ ר' בנימין אייזענבערגער אב"ד היכל התפילה, אב"ד אמונת ישראל, אבד"ק היבנוב, אבד"ק סאדאוונא, אבד"ק מנחת חינוך טארטיקוב, הגה"צ אבד"ק ברעזאן, אב"ד קאמאדא, אב"ד שעדליץ, אב"ד אמרי יהודה ברעזאן, אב"ד ברעזנא, אב"ד יאקע, אב"ד מחזה אברהם, אב"ד שאטו פארק לעיקוואד, אב"ד שאפראן, הגה"צ ר' חיים מאיר האגער בן האדמו"ר מוויזניץ, הגה"צ ר' נחום טווערסקי שליט"א איידעם ביי הרה"ק מראחמיסטריווקא זי"ע, און נאך פילע רבנים ואנשים חשובים.
אין די זעלבע צייט האבן פילע אידן זיך פארזאמלט אין ביהמ"ד הגדול דקהל תורת חיים וויזניץ אין ירושלים צו מיטהאלטן די לוויה דורכ'ן טעלעפאן, באותו מקום וואו דער רבי זצ"ל האט צענדליגע שבתים געפראוועט בעבודת קדשו מיט אויסטערלישע געגועים צום מקום הקודש והמקדש, אין די זוממער וואכן מדי שנה בשנה.
ארום א פערטל צו צוויי איז די מיטה אנגעקומען פארנט פון ישיבה אור ודעת אויף טשעסנאט רידזש בגלילות מאנסי, וואו עס האבן אפגעווארט כ"ק אדמו"ר מסקווירא שליט"א און כ"ק אדמו"ר מסאטמאר שליט"א, הרה"ח ר' דוד בערגער שליט"א משב"ק כ"ק אדמו"ר מסקווירא שליט"א האט געזאגט קל מלא רחמים, און דערנאך האבן די צוויי רבי'ס און פילע באגלייטער מלווה געווען די מיטה א שטיק וועג.
האלב נאך צוויי איז די מיטה אנגעקומען ברחבת ביהמ"ד הגדול אין שיכון וויזניץ מאנסי, וואו עס האבן זיך אנגעזעהן בראש המלווים כ"ק אדמו"ר מוויזניץ שליט"א פון ארה"ק וועלכער איז צוגאסט די טעג אין ניו יארק, און כ"ק אדמו"ר מוויזניץ שליט"א פון מאנסי. אזוי אויך האבן זיך אנגעזעהן די הונדערטער בחורי הישיבות דחסידי וויזניץ וועלכע זענען אריינגעקומען קיין מאנסי אפצוגעבן דעם כבוד האחרון פארן קאסובער רבי'ן זצ"ל נצר לשלשלת בית קאסוב וויזניץ און לאנגיעריגער דיין ומורה צדק אין די וויזניצע קהילה אין בארא פארק.
אנקומענדיג פארנט פון ביהמ"ד הגדול וויזניץ האט מען געעפנט די קאר, הרה"ג ר' יחיאל שטיינמעטץ שליט"א מרבני הקהילה האט פארגעזאגט קל מלא רחמים בהתעוררות רב, דערנאך האט מען ארויסגענומען די מיטה פון קאר און אנגעהויבן באגלייטן צופיס די גאנצע וועג ארויף ביז צום וויזניצע בית החיים אויף 306.
טראץ די שווערע רעגן וואס האט זיך אראפגעלאזט העכער די טויזענטער משתתפים ביי די גרויסע לוויה אין מאנסי, האבן די מאסן אידן ווייטער באגלייט צופיס לחלוק כבוד האחרון פארן געטרייען מנהיג און צדיק וקדוש, ארום א פערטל צו פיר איז די מיטה אנגעקומען צום בית החיים, וואו מען האט דורכגעפירט די קבורה ביים חלקת מחוקק ספון, נעבן זיין גרויסן פאטער דער קאסוב זאליטשיקער רבי זצ"ל, הארט נעבן מקום מנוחת הקודש פון הרה"ק מריבניץ זי"ע.
נאך די קבורה האט הרה"ג ר' יחיאל שטיינמעטץ שליט"א מרבני קהילה קדושה וויזניץ פארגעזאגט צידוק הדין, און דערנאך האבן די קינדער האדמורי"ם והרבנים געזאגט קדיש, אצינד געפונען זיך די קינדער פון רבי'ן זצ"ל אין שטוב פון הנגיד החסיד ר' איסר ראטה הי"ו אין מאנסי, דארט וואו זייער פאטער דער רבי זצ"ל האט לאנגע יארן געהאט די אכסניא וויילנדיג אין מאנסי, וואו עס קומען מנחם אבל זיין כ"ק אדמו"ר מסקווירא שליט"א, כ"ק אדמו"ר מוויזניץ שליט"א פון ארה"ק, און כ"ק אדמו"ר מוויזניץ שליט"א פון קייאמישע.
צווישן די באטייליגטע ביי די גרויסע לוויה אין מאנסי האבן זיך אנגעזעהן האדמורי"ם לבית וויזניץ פון ארה"ק, מאנסי, קייאמישע, און בארא פארק, כ"ק האדמורי"ם מראחמיסטריווקא פון מאנסי און ספרינג וואלי, כ"ק האדמורי"ם מסקולען פון מאנסי, לעיקוואד, און ירושלים, האדמורי"ם מבית יצחק ספינקא, גאלאנטא, סערט וויזניץ ארה"ב, סטאניסלאוו, סקווירא מאנסי, זידטשויב פרעמיסלא, אוסטראה, אשוואר, צאנז קרית יואל, זוטשקא מאנסי, גאב"ד טאהש מאנסי, אב"ד סאטמאר מאנסי, אבד"ק סאלקא, אבד"ק ביסטריץ, אבד"ק מאדא, אבד"ק טשענסקאוויץ.
זכר צדיק לברכה לחיי העולם הבא
