היינט זונטאג קומט פאר א ספעציעלע מעמד הכתרה אין שטאט ציריך אין שווייץ, לכבודו פון הגה"צ ר' צבי אלימלך פאדווא שליט"א לאנגיעריגער דיין ומורה צדק אין קהל אגודת אחים, וועלכער ווערט אויפגענומען לכהן פאר אלס רב ואב"ד פון די קהילה קדושה אגודת אחים, אויפן פלאץ פון זיין שווער הגה"צ ר' שאול ברייש זצ"ל רב הקהילה, נאך די בחירות וואס איז פארגעקומען מיט עטליכע וואכן צוריק.
די פרייליכע טעג ימי חגיגה האט זיך שוין אנגעהויבן בעצם יום השבת, ביים גרויסן שבת הכתרה שבת ראש חודש וואו עס האבן זיך פארזאמלט אלע חברי הקהילה, שבת נאכמיטאג האט דער נייער גאב"ד אויפגעטרעטן מיט די איינצוגס דרשה כנהוג מדור דור, און דערנאך געפראוועט שלש סעודות מיט גרויס התעוררות.
די גרויסע מעמד הכתרה וועט פארקומען אין די צענטראלע בית הכנסת דקהל אגודת אחים, וואו עס זענען געלאדנט געווארן אלע חברי הקהילה אנשים נשים וטף, עס וועט זיך אנהייבן פינף אזייגער נאכמיטאג, די מענער וועלן זיין פארזאמלט אין די היכל בית הכנסת און די עזרת נשים, די בחורי הקהילה אין די היכל בית המדרש און די עזרת נשים, די פרויען אין די חצר נעבן די בנין הקהילה, און די קינדער אין די זאל פון די קהילה.
בהדרת כבוד וועט מען מקבל זיין דעם חשובן גאסט הגה"צ ר' אהרן שיף שליט"א גאב"ד אנטווערפן, וועלכער וועט אויפטרעטן מיט די צענטראלע דרשה ביים מעמד, עס וועט ווערן באגלייט מיט לעבעדיגע מוזיק און געזאנג לכבודה של תורה.
