ווי ברייט באריכטעט מיט צוויי וואכן צוריק, ווערט געפלאנט א היסטארישע מסע הצלת עולם התורה, דורך זעקס גדולי ומאורי הדור פון ארץ ישראל, וואס גרייטן זיך ווידעראמאל צו נעמען דעם וואנדער שטעקן אין די הענט און ארויספארן אין די מרחקים, אויפצוטרייבן ריזיגע געלטער לטובת די ניי געגרינדעטע קרן עולם התורה, צו פינאנצירן די ישיבות און כוללים בארצינו הקדושה, אין ליכט פון די פארשטערקערטע גזירת גיוס בני הישיבות וואס האט דראסטיש געשניטן די הכנסות פאר די פינאנציעלע בודזשעט אין פילע ישיבות.
אצינד שטייענדיג בלויז געציילטע טעג בעפאר די היסטארישע נסיעה, ווערט פארעפנטליכט די גענויע דעטאלן איבער וואס עס וועט זיך אפשפילן די קומענדיגע וואך על אדמת ענגלאנד, ווען צום הויכפונקט וועט פארקומען די היסטארישע מעמד אין לאנדאן הבירה, מעמד כבוד התורה וקבלת פני רבותינו.
די גרויסארטיגע מעמד וועט פארקומען קומענדיגן דינסטאג אווענט, אין די ריזן גיגאנטישע זאל פון די געוועזענע אייקיע צענטער, וואס געפונט זיך נעבן די מערידיען גרענד חתונה זאל, א קנאפע פערטל שעה צו פארן פון די היימישע סטעמפארד הילל געגנט. די ריזן זאל וועלכע ווערט היינט גערופן "דראמשעדס" איז פארצייכנט אלס די גרעסטע זאל אין גאנץ ענגלאנד, און קען ארייננעמען אין זיך אזויפיל ווי פופצן טויזענט זיץ פלעצער!
ביים גרויסן מעמד וועלן זיך צוזאמקומען טויזענטער אידן פון אלע שיכטן און קרייזן, מקבל צו זיין די גדולי הדור פון אלע שיכטן און קרייזן, כ"ק אדמו"ר מראחמיסטריווקא שליט"א, מרנן ורבנן ראשי ישיבת סלאבאדקע, הגאון הגדול רבי דוב לאנדא, און הגאון הגדול רבי משה הלל הירש שליט"א. הגאון הגדול רבי דוד כהן שליט"א ראש ישיבת חברון, הגאון הגדול רבי יעקב הלל שליט"א ראש ישיבת אהבת שלום, און הגאון המשגיח רבי דן סגל שליט"א.
עס איז ערווארטעט א ריזן צוזאמפאר פון טויזענטער אידן פון אלע אידישע געגנטער אין לאנדאן, סטעמפארד הילל, גאלדערסגרין, עדזשווער, און הענדאן. אויך פילע אידן פון מאנטשעסטער און געיטסהעד און נאך פארשידענע שטעט און ווייטערע פלעצער, וואס קענען זיך נישט ערלויבן צו פארפאסן אזא היסטארישע מעמד.
ביים מעמד וועט אויפגעשטעלט ווערן א גרויסע בימת הכבוד פאר די חשובע גדולי הדור, אין צוגאב צו צענדליגע רבנים אדמורי"ם וראשי ישיבות פון נאנט און ווייט וואס וועלן זיך באטייליגן און צוגעבן צום בימת הכבוד, עס וועלן געהערט ווערן דרשות פון כ"ק אדמו"ר מהורדענקא שליט"א פון מאנטשעסטער, הגה"צ ר' אפרים וואקסמאן שליט"א ראש ישיבת מאור יצחק, און הגאון הגדול רבי אברהם גורוויץ שליט"א ראש ישיבת געיטסהעד.
א ספעציעלע מכתב קודש איז ערשינען מטעם בית דין צדק פון התאחדות קהילות החרדים אין לאנדאן, אונטערגעשריבן דורך די חברי הביד"ץ רבנים ודיינים, ואתם עמם בחתימת יד קדשו כ"ק אדמו"ר מוויזניץ שליט"א פון לאנדאן, וואו זיי רופן דעם ציבור זיך משתתף צו זיין, און צולייגן א פלייצע צו די שווערע עול וואס די גדולי הדור טראגן אויף זיך.
