די אידישע געמיינדע אין טערקיי באוויינט די פטירה פונעם הויפט רב הרב יצחק חליבה זצ"ל, וועלכער איז געווען א מיטגליד אין די רבנים פאראיין "איחוד הרבנים במדינות האיסלאם", און איז היינט נפטר געווארן אין עלטער פון פיר און אכציג יאר.
דער חכם באשי הרב חליבה זצ"ל, איז געבוירן געווארן אין טערקיי חודש ניסן ת"ש, אין די גרויסע באקאנטע שטאט אינסטאנבול. אלס בחור האט ער געלערנט אין די בארימטע ישיבה "פורת יוסף" אין ירושלים, ביי די גאונים מפורסמים רבי עובדיה יוסף זצ"ל און רבי שמעון בעדני זצ"ל. אלס אינגערמאן איז ער געווארן אויפגענומען אלס א דיין ומורה צדק אין טערקיי, און מיט ארום דרייסיג יאר צוריק איז ער געווארן אויפגענומען אלס סגן רב אין לאנד, צו די רעכטע האנט פונעם הויפט רב הרב דוד אסאו זצ"ל.
נאך וואס דער הויפט רב הרב אסאו זצ"ל איז נפטר געווארן, איז הרב חליבה זצ"ל געווארן אויפגענומען אלס הויפט רב פאר אלע אידישע קהילות אין טערקיי, און אסאך אויפגעטון פאר די אידישע געמיינדע אין פארשידענע הינזיכטן, ווען צו די זעלבע צייט האט ער זיך געהאלטן נאנט מיט די לאקאלע פאליטיקאנטן.
די לוויה וואס וועט פארקומען ביים גרויסן בית הכנסת נוה שלום אין שטאט אינסטאנבול, איז באשטימט אויף מארגן דאנערשטאג צוועלף אזייגער מיטאג ארטיגע צייט, און ער וועט קומען לקבורה אויפן אידישן בית החיים דארט אין טערקיי.
