די נאכט נר א' דחנוכה איז נפטר געווארן אין שיכון סקווירא הרב החסיד ר' ישראל משה דירנפעלד ע"ה, וועלכער איז געווען פון די גאר חשובע עסקנים למען טוהר המחנה, צו שטיין על המשמר קעגן די פגעי הטעכנעלאגיע, און האט באגלייט די הצלחה פונעם גרויסן כינוס כלל ישראל מיט אן אומבאשרייבליכע געטריישאפט.
ר' ישראל משה איז געווען פון די חשובע איינוואוינער אין סקווירא שטעטל, מפארי הדרה, אדוק ומקושר צו כ"ק אדמו"ר הרה"ק מסקווירא זי"ע און ביי להבחל"ח כ"ק אדמו"ר מסקווירא שליט"א. שוין אלס אינגערמאן איז ער געווען פון די טעטיגע עסקנים וואס האבן לוחם געווען קעגן די טעכנעלאגישע נסיונות, און מיט ארום פופצן יאר צוריק איז ער געווען פון די פיאנערן אוועקצושטעלן דעם באקאנטן "איחוד הקהילות לטוהר המחנה", וואס איז עווענטועל געווען דער פונדאמענט פאר די היסטארישע כנסיה לשם שמים "כינוס כלל ישראל".
ר' ישראל משה האט אסאך געלייסטעט למען קדושתן של ישראל, געווען נערץ ונקדש ביי גדולי הדור, בראשם כ"ק אדמו"ר הרה"ק מסקולען זי"ע, און הגאון הגדול רבי מתתיהו סאלאמאן זצ"ל משגיח ישיבת בית מדרש גבוה, צו וועמענס רעכטע האנט ער איז צוגעשטאנען צו ארגענעזירן דעם היסטארישן כינוס כלל ישראל ערב ראש חודש סיון תשע"ב.
ליידער איז ער נישט געזונט געווען די לעצטע תקופה, און נעכטן אויפדערנאכט איז ער נפטר געווארן אין עלטער פון אכט און זעכציג יאר. די לוויה איז פארגעקומען בחצות הלילה פארנט פון ביהמ"ד הגדול אין שיכון סקווירא.
