מטעם בית כ"ק אדמו"ר מוויזניץ שליט"א איז באשטעטיגט געווארן אז דער רבי שליט"א וועט אונטערנעמען א ערשטמאליגע מסע הקודש צום עיר התורה והחסידות לעיקוואד, און פראווענען א געהויבענע שבת בקרב חסידיו תושבי העיר, צום ערשטן מאל וואס דער רבי וועט פראווענען א גרויסע שבת אין לעיקוואד זינט ער איז נתעלה געווארן בכתר האדמורו"ת.
די געהויבענע נסיעה וועט פארקומען קומענדיגן חודש כסלו, און וועט זיין געווידמעט צו מחזק זיין קהל חסידי וויזניץ תושבי העיר, און אויפטרייבן גרעסערע סכומים לטובת די מרכז העולמי שע"י מרכז חסידי וויזניץ וואס ווערט געבויעט לשם ולתהלה אין עיר התורה והחסידות בני ברק.
דער רבי וועט אנקומען קיין לעיקוואד דינסטאג פרשת ויצא, און וויילן אין שטאט פאר צוויי וואכן, מיט עטליכע באזוכן אין פארשידענע געגנטער בסביבות העיר, דורכאויס די באזוך וועט פארקומען א מעמד הכנסת ספר תורה וואס וועט אריינגעגעבן ווערן לבית מדרשו אין לעיקוואד.
