די עולם התורה טרויערט נאך א שרעקליכע אבידה, מיט די פלוצלינגדיגע פטירה פון הגאון הגדול רבי אברהם אוזבאנד זצ"ל ראש ישיבת טעלז אין ריווערדעיל ניו יארק, וועלכער איז נפטר געווארן די נאכט אין עלטער פון זעקס און זיבעציג יאר, נאכן ליידן א פאטאלע הארץ אטאקע אינמיטן די סדרי הלימודים אין ישיבה.
הגאון ר' אברהם איז געווען א זון פון הגאון ר' יצחק אייזיק אוזבאנד זצ"ל ראש ישיבת טעלז אין קליוולאנד, א איידעם ביי הגאון ר' אברהם יצחק בלאך זצ"ל ראש ישיבת טעלז אין די ליטע. אין זיינע יונגע יארן איז ער אויפגעוואקסן בין כותלי הישיבה אין קליוולאנד אהייא, זייענדיג א תלמיד מובהק פון הגאון הגדול המפורסם רבי מרדכי גיפטער זצ"ל ראש ישיבת טעלז.
בהגיעו לפירקו איז ער געווארן אן איידעם ביי הגאון ר' בנימין ציילבערגער זצ"ל ראש ישיבת בית התלמוד אין ניו יארק, א אייניקל פונעם באקאנטן גאון ר' ישראל חיים קאפלאן זצ"ל. ר' אברהם האט אויפגעשטעלט א אייגענע ישיבה בדרך אבותיו ורבותיו, די בארימטע טעלזער ישיבה אין ריווערדעיל וואס האט שוין ארויסגעגעבן טויזענטער תלמידים אין לויף פון די יארן, נאנטע תלמידים וואס זענען געבליבן נאנט מיט אים אויך אויף יארן שפעטער.
דעם מיטוואך ראש חודש אלול האט זיך אנגעהויבן די נייע זמן הלימודים אין ישיבה מיט א פרישקייט, אבער ליידער א טאג דערויף אינמיטן מרביץ תורה זיין אין ישיבה איז דער ראש ישיבה צוזאמגעפאלן ל"ע, און טראץ נאכאנאנדע פרואוון צו ראטעווען זיין לעבן איז באשטעטיגט געווארן זיין פלוצלינגדיגע פטירה ה"י.
די לוויה קומט פאר יעצט פארמיטאג בהיכל ישיבת טעלז אין ריווערדעיל, און מוצאי שבת וועט די מיטה געפירט ווערן קיין ארץ ישראל לקבורה.
