די זעלטן הויכע פרייזן וואס עס קאסט ארויסצודינגען דירות לכבוד יום טוב, איז היי יאר געפאלן אויף א שווערע פארנעם אויף עטליכע גרויסע חסידישע קהילות אין ארץ ישראל, איבערהויפט אין ירושלים עיה"ק, וואו טויזענטער אידן קומען פון נאנט און ווייט וויילן ביי זייערע רבי'ס אויף יו"ט, און די פארלאנג פאר דירות צו דינגען איז זייער הויעך.
צוליב די הויכע פרייזן איז אוועקגעשטעלט געווארן אין בעלזא הויף א ספעציעלע "וועדת הדיור" וואס גיבט זיך אפ מיט אלעס ארום דירות, א קול קורא איז ערשינען אונטערגעשריבן דורך די חברי הביד"ץ דקהל מחזיקי הדת בעלזא, וואו זיי ברענגען ארויס די וויכטיגקייט פון שטיין צו די רעכטע האנט פון די וועד, און דינגען בלויז דורך זיי, מיט דעם וואס זיי מאכן זיכער צו האלטן די פרייזן אויף א נידריגע שטאפל, מיטן אנהאלטן די מארקעט אויף די דירות.
די וועדת הדיור האט ערהאלטן די פולע הסכמה פון כ"ק אדמו"ר מבעלזא שליט"א, און זיי האבן ארויסגעשטעלט ספעציעלע פרייזן וויפיל עס איז ערלויבט צו צאלן פאר א דירה, געוואנדן לויט די צאל צימערן און צאל בעטן.
פון חצר הקודש ביאלא איז געמאלדן געווארן, אז די עסקני הקהילה ארבעטן האנט ביי האנט מיט די עסקנים פון וועדת הדיור דחסידי בעלזא, און מיט זייער מהלך וועט מען אויך פארדינגען דירות פאר ביאלא חסידים, וואס די גרויסע ביהמ"ד דחסידי ביאלא איז נישט ווייט פון קרית בעלזא ירושלים.
אזוי אויך איז אוועקגעשטעלט געווארן ספעציעלע תקנות דורך די בית דין אין קרית צאנז נתניה, וועלכע האבן פאראויסגעשריבן די גענויע פרייזן ביז וויפיל מען מעג צאלן פאר א דירה אויף יום טוב, צוליב די הויכע פארלאנג און די הויכע פרייזן וואס די דירות אייגענטומער בעטן דערפאר.
אין די זעלבע צייט איז געמאלדן געווארן א איבעראשנדע הוראה פאר כלל חסידי באיאן, אז דאס יאר איז נישט ערלויבט צו דינגען דירות אין ירושלים אויף די ימים הנוראים צו קומען וויילן ביים רבי'ן אויף ראש השנה, צוליב די זעלטן הויכע פרייזן וואס איז פארהאן אויף די דירות, און עס איז א מצב וואס אין הציבור יכולין לעמוד בו.
כ"ק אדמו"ר מבאיאן שליט"א האט באאויפטראגט די עסקני הקהילה און די רבנים צו זעהן וואס מען קען טון, און ביי אן אסיפה איז באשלאסן געווארן צו גענצליך אסר'ן דאס דינגען דירות, און די חסידים פון אנדערע שטעט זענען נאר ערלויבט צו קומען אליינס אן די משפחות, און אש"ל מלא וועט ווערן צוגעשטעלט פאר אלע מענער געסט. צוליב דעם וואס די נשות החסידות וועלן פארבלייבן אינדערהיים, וועט אין יעדע קלויז פארקומען א באזונדערע מנין אויף ראש השנה, די פרויען זאלן דארט קענען מיטהאלטן די תפילות.
אין א פרישע מודעה פון קהל הקודש באיאן איז געמאלדן געווארן אז די חסידים וואס האבן נישט די מעגליכקייט צו קומען אליינס אן די משפחה, זענען ערלויבט צו דינגען דירות בלויז מיט די באשטימטע פרייזן.
