יעצט מיטוואך ביינאכט איז באשטעטיגט געווארן אז די גרויסארטיגע עצרת זעקת הגולה וואס איז געפלאנט אויף קומענדיגן זונטאג פרשת נצבים וילך, וועט פארקומען אויף א גיגאנטישע שטח אין נוארק ניו דזשערזי, ארום א שעה צו פארן פון אלע היימישע געגנטער אין ניו יארק און ניו דזשערזי.
די גענויע לאקאל אויף בראוד סטריט אין נוארק, וואס ווערט גערופן בראוד סקווער, איז א גיגאנטישע שטח מיט גענוג פלאץ פאר צענדליגע טויזענטער אידן, די גאסן ארום וועלן זיין פארשלאסן, אריינגערעכנט א ברייטע הייוועי הארט דערנעבן, וואס וועט ערמעגליכן נאך פלאץ פאר טויזענטער אידן אנטייל צונעמען, און א באזונדערע סטראטעגישע ארט וועט זיין צוגעשטעלט פאר די פרעסע, כדי די קול מחאה אדירה זאל האבן א ווייטע אפקלאנג קבל תבל ומלואה.
א מאסיווע קראפט פון עסקנים זענען מאבאליזירט ארויסצוהעלפן און באגלייטן דעם ריזן עצרת תפילה ומחאה צו א שטארקע סוקסעס, און די גענויע פלענער ווערן ווייטער אויסגעארבעט צו פארזיכערן אז פון אלע שיכטן און קרייזן קומט מען ארויס מיט א פאראייניגטע קול זעקה להעביר את רוע הגזירה.
צווישן די צוגרייטונגען רעכנט זיך אריין העפטיגע הכנות אויפן שטח און ארום, וואו מען האט שוין דעזיגנירט פארקינג פלעצער פאר איבער טויזענט באסעס וואס וועלן פירן דעם ציבור פון אלע חרדישע שטעט לענגאויס ניו יארק און ניו דזשערזי.
אויך איז ערשינען היינט א געמיינזאמער קול קורא אונטערגעשריבן דורך מערערע אדמורי"ם רבנים און ראשי ישיבות פון איבער גרעיטער ניו יארק און ניו דזשערזי, וואו די גדולי הדור רופן דעם ציבור זיך צוזאמצוקומען און לאזן הערן א קול מחאה וצעקה אויף א פאראייניגטע פארנעם.
