קדשו צום קראו עצרה, הערט מען פון טויזענטער היימישע אידן תושבי בארא פארק, וואס קלאגן און טרויערן נאך די שרעקליכע פארלוסטן, מיטן הסתלקות פון א רייע צדיקים וקדושים וואס האבן באלאכטן די שטאט, הגה"צ ר' משה וואלפסאן זצ"ל אבד"ק אמונת ישראל, כ"ק אדמו"ר מקאסוב זצ"ל, און כ"ק אדמו"ר מסקולען זצ"ל, וועלכע זענען ליידער אוועקגעריסן געווארן אין די לעצטע פאר חדשים, שאפנדיג אן אומגעהויערע חלל אין די גאנצע שטאט וואס שפירט זיך ביי יעדן אין הארץ.
על פי קריאת הרבנים הגאונים, מנהיגי הקהילות הקדושות אין שטאט בארא פארק, איז באשטימט געווארן אויף מארגן דאנערשטאג א גרויסע עצרת חיזוק והתעוררות, וואס וועט צונויפברענגען טויזענטער אידן תושבי העיר זיך צו מחזק זיין און מעורר זיין נאך די שווערע תקופה, לשמוע את דבר השם צו אנגיין ווייטער, און מספיד זיין די הייליגע צדיקים וואס האבן פארשיינט די שטאט מיט זייער תורה און צדקות.
די גרויסע עצרת וועט פארקומען מארגן דאנערשטאג אויפדערנאכט אין די זאלן פון עטרת חי' אין צענטער פון שטאט, עס וועלן געהערט ווערן דרשות דורך כ"ק הגה"צ גאב"ד טענקא שליט"א, הגה"צ ר' יחיאל מיכל שטיינמעטץ שליט"א דומ"ץ סקווירא בארא פארק, און דער חשובער גאסט פון ארץ ישראל הגה"צ ר' צבי מאיר זילבערבערג שליט"א ראש חבורת נחלת יעקב.
פרקי תהלים וועט ווערן פארגעזאגט דורך מרן המשגיח הגאון רבי דן סגל שליט"א, וואו מען וועט אינאיינעם מעורר זיין רחמי שמים אויף די גאנצע שטאט, צו באשיצט ווערן מכל נגע ומחלה.
