אין די צייט ווען כלל חסידי וויזניץ ברחבי תבל גרייטן זיך צום היסטארישן מאמענט אנצוהייבן ש"ס על הסדר, במסגרת הלימוד מאמר מרדכי דחסידי וויזניץ העולמי, גרייטן זיך די הונדערטער חסידים תושבי ארץ הקודש צו מיטהאלטן א געהויבענע מעמד "קשר נצחי" געאייגנט פאר די חסידים פון ארץ ישראל, און וועט באשיינט ווערן אין שפיץ פון כ"ק אדמו"ר מוויזניץ שליט"א פון בית שמש.
די גרויסע מעמד וועט פארקומען דעם קומענדיגן מוצאי שבת קודש פרשת ויגש, אין די פראכטפולע זאל אין אזור התעשיה ברוש, נישט ווייט פון בית שמש, וואס וועט צוגערישט ווערן אויף א פראכטפולע פארנעם כראוי וכיאות לכבוד התורה ולומדיה. דערביי וועט מען מסיים זיין מסכת בבא בתרא און גאנץ סדר נזיקין, און אנהייבן מסכת ברכות פון אנהייב ש"ס, מיטן צוברענגען נאך פילצאליגע לומדים אין די וויזניצע מסגרת, לזכר נשמתו ולקיום צוואתו הטהורה פון כ"ק אדמו"ר הרה"ק בעל תורת מרדכי מוויזניץ זי"ע.
א ספעציעלע מכתב קודש איז ערשינען די טעג אונטערגעשריבן דורך כ"ק האדמורי"ם מוויזניץ שליט"א פון ירושלים און בית שמש, וואו זיי רופן דעם ציבור חסידים די חברי הקהילה זיך צו קומען מיטפרייען און זיך פערזענליך כולל זיין אינעם סדר הלימוד פון מאמר מרדכי, כאוות נפשו הטהורה פונעם טאטן דער רבי זצ"ל וועלכער האט געבעטן פון די חסידים צו לערנען איין בלאט א טאג לעילוי נשמתו.
אויך אין ניו יארק גייען אן פיבערהאפטיגע הכנות צום גרויסארטיגן חגיגה און די התחלת הש"ס, ווען אין אלע וויזניצע צענטערן טוען די עסקנים ארויפארבעטן דעם סדר הלימוד, און אריינברענגען נאך הונדערטער לומדים אין די מסגרת. אין מאנסי איז פארלאפענע וואך פארגעקומען א ספעציעלע חברותא דרייוו קאמענד צענטער, וואו צענדליגע עסקנים האבן טעלעפאנירט אלע חברי הקהילה און אנגעבאטן סיי וועלכע הילף צוצושטעלן חברותות און שיעורים אויפן בעסטן פארנעם.
