נעכטן זונטאג נאכט אין ארץ ישראל האבן פילע חסידי תולדות אהרן בארץ הקודש זיך פארזאמלט אויף א געמיינזאמע אסיפת חיזוק והתעוררות, בפקודת הקודש פון כ"ק אדמו"ר מתולדות אהרן שליט"א, אין ליכט פון די שרעקליכע מאורעות וואס האט לעצטנס באטראפן די קהילה, שווערע טראגעדיעס און אבידות, ווען חשובע אידן אין די קהילה זענען ליידער אינגערהייט אוועקגעריסן געווארן ה"י.
א ספעציעלע בריוו איז ערשינען אונטערגעשריבן דורך די דייני הקהילה, הגה"צ ר' יעקב מענדיל יאראוויטש שליט"א און הגה"צ ר' אהרן בראנדסדארפער שליט"א, חברי ביד"ץ העדה החרדית, הגאון ר' רפאל סאקס שליט"א און הגאון ר' ברוך יהודה היימליך שליט"א מרבני הקהילה, וואו די רבנים האבן גערופן דעם ציבור אנטייל צו נעמען ביי די אסיפה. און אזוי אויך איז די אסיפה אהערגעשטעלט פאר די נשים צדקניות מיטצוהאלטן פון די ווייבער שוהל אדער דורכ'ן טעלעפאן מיטן רבינ'ס שטיצע.
מיט די צענטראלע משא המעמד האט אויפגעטרעטן הגה"צ המשפיע מלהיב לבבות ישראל רבי צבי מאיר זילבערבערג שליט"א ראש חבורת נחלת יעקב, און דערנאך האט מען געהערט די דברות קודש פון כ"ק אדמו"ר מתולדות אהרן שליט"א, וועלכער האט אדרעסירט דעם ציבור מיט פארשידענע ענינים הצריכים חיזוק.
דורכאויס די דברות קודש האט דער רבי שליט"א גערעדט איבער די וויכטיגקייט פון מתפלל זיין פאר די גדולי ישראל וואס זענען אנגעוויזן אויף רחמי שמים, דער רבי האט דערמאנט אחיו הגדול כ"ק אדמו"ר מתולדות אברהם יצחק שליט"א כ"ק הרה"צ רבי שמואל יעקב בן יענטא לרפואה שלימה, וועלכער געפונט זיך נישט אין א גוטע געזונט צושטאנד ל"ע, כ"ק אדמו"ר מוויזניץ שליט"א כ"ק הרה"צ רבי ישראל בן לאה אסתר לרפואה שלימה, און כ"ק אדמו"ר מערלוי שליט"א, לקיים בנו חכמי ישראל.
