א שוידערליכע עקסידענט האט פאסירט היינט צופרי אויפן פאנאוויטשער בית החיים אין בני ברק, ווען א עלטערע אידישע פרוי איז ליידער טראגיש אומגעקומען רח"ל, נאכן ווערן אראפגעקלאפט דורך א טראק, שטייענדיג אינמיטן דאווענען ביי קברי אבות.
די חשובע פרוי מרת אסתר אילני ע"ה, זיבן און זיבעציג יאר אלט, איז געווען א טאכטער פון הרב אשר קליין ז"ל, איר מאן הרה"ג ר' צבי זאב אילני שליט"א איז דער רב פון א שוהל אין בני ברק, און א באקאנטער מחנך אין שטאט. די נפטרת ע"ה איז געווען א מחנכת לאנגע יארן און אויפגעשטעלט געטרייע תלמידות. זי פלעגט אסאך פוקד זיין די קברי צדיקים און קברי אבות צו מתפלל זיין לישועת הכלל והפרט, און אויך היינט צופרי איז זי ארויס דאווענען אויפן פאנאוויטשער בית החיים ביי די קברי צדיקים.
שטייענדיג ביים ציון פון הגאון הרב שך זצ"ל אינאיינעם מיט נאך משפחה מיטגלידער, איז א טראק אריבערגעפארן און איר אראפגעקלאפט, זי איז פארכאפט געווארן אונטער די טראק, און ווען עמערדזשענסי לייט האבן איר באוויזן ארויסצונעמען, האבן זיי ליידער נישט געקענט טון מער ווי באשטעטיגן איר טראגישע פטירה ה"י.
די לוויה קומט פאר יעצט נאכמיטאג ביי איר שטוב אין בני ברק, און זי וועט קומען לקבורה במקום פטירתה אויפן פאנאוויטשער בית החיים.
