שטייענדיג געציילטע שעה בעפאר כניסת השבת, טוען תלמידי וחסידי וויען זיך גרייטן בהכנה דרבה מיטלעבענדיג זעלטענע געהויבענע טעג, ווען עס ווערט אפגעצייכנט היסטאריע בקורות ימי הקהילה והחסידות, ווען אלע תלמידים וחסידים אינאיינעם זענען מסיים א מהודר'דיגע ספר תורה וואס איז געשריבן געווארן לכבודו ולזכותו פונעם מנהיג העדה כ"ק אדמו"ר מוויען שליט"א.
צום היסטארישן געלעגנהייט איז באשטימט געווארן דעם שבת אלס זמן קהילה לכל, ווען עס קומט פאר א גייסטרייכע "שבת הקהילה", שבת התאחדות פאר אלע תלמידים וחסידים אינאיינעם, און פאר דעם איז ארויסגעדינגען געווארן די פראכטפולע ארמון האטעל אין סטעמפארד קאנעקטיקוט וואס וועט דינען אלס אכסניא של תורה וחסידות פאר דעם געהויבענעם שבת, און גייסטרייכע מעמד מוצאי שבת קודש ווען מען וועט מסיים זיין די הייליגע ספר תורה.
די ימי החגיגה האט זיך שוין אנגעהויבן אין די לעצטע פאר טעג, ווען עס איז פארגעקומען די מעמדי כתיבת האותיות בביתו נאוה קודש פון כ"ק אדמו"ר מוויען שליט"א, ווען די נדיבי לב וואס האבן געקויפט א זכות אין די ספר תורה, האבן געהאט די געלעגנהייט אריינצושרייבן אן אות אינעם ספר תורה.
אויף שבת קודש וועלן זיין צוגאסט גאר חשובע מגידים מפורסמים, הגה"צ ר' דניאל אלתר שליט"א ראש ישיבת פני מנחם ורב ביהמ"ד ארי שבחבורה, וועלכער איז ספעציעל געקומען צו פארן פון ארץ ישראל אויפצוטרעטן ביים סעודת ליל שבת קודש. אויפן געזאנג פלאטפארמע וועט באשיינען דער מייסטער בעל מנגן און בדחן פון ארץ ישראל הרב ישראל אדלער הי"ו, און עטליכע מאל דורכאויס שבת וועט מען האבן די זכיה צו הערן דברות קודש פונעם רבי'ן שליט"א, און ווארעמע בליציגע ווערטער פונעם אורח הכבוד הרה"ג ר' מרדכי שיף שליט"א רב ביהמ"ד איגוד אברכים אין בארא פארק.
מוצאי שבת קודש וועט פארקומען די צענטראלע מעמד סיום כתיבת ספר תורה, ווען דער רבי שליט"א וועט צוענדיגן שרייבן די מהודר'דיגע ספר תורה און משמיע זיין א לענגערע דרשה פאר די חסידים, מען וועט הערן א דרשה בעניני חינוך און שידוכים דורך המחנך נפלא הרב אלעזר יונה זילבערמאן שליט"א, און א דרשה דורך הרה"ג ר' מרדכי שיף שליט"א.
די גרויסע מעמד הכנסת ספר תורה וועט פארקומען זונטאג נאכמיטאג ברחובות העיר וויליאמסבורג, צוערשט א מעמד הכנה פאר די ילדי התשב"ר אין ביהמ"ד הגדול דקהל עדת יראים וויען, דערנאך די תהלוכה לכבודה של תורה מבית כ"ק אדמו"ר מוויען שליט"א, דערנאך די ריקודין קדישין און מסיבת לחיים אין ביהמ"ד הגדול, און צום שלוס די סעודה לגומרה של תורה פאר די בחורי הקהילה אין שפיץ פונעם רבי'ן שליט"א.
