אלפי חסידי בעלזא האבן מיטגעהאלטן א היסטארישע חגיגה מיטן נאמען "עשר עטרות", ווען עס איז אפגעצייכנט געווארן כבוד התורה בתפארה, צום צייכענונג פון פינף און פערציג יאר צום התייסדות פון קהילה קדושה מחזיקי הדת און די בית דין צדק, מוקיר זיין פעולות לתורה והוראה און פאראייניגן כלל חסידי בעלזא צו דעם היסטארישן מאמענט.
די פערזענליכע באטייליגונג פונעם נשיא העדה כ"ק אדמו"ר מבעלזא שליט"א האט אויפגעפלאמט די הערצער פון די טויזענטער פארזאמלטע, זייענדיג שוין היינט א זעלטענע ערשיינונג אז דער רבי זאל ארויסגיין פון שטוב צוליב זיין שוואכקייט. טראץ די שוועריגקייטן ארום און ארום האט זיך דער רבי אנגעשטרענגט און באשיינט בראש המסובים, און אויפגעטרעטן מיט דברות קודש לכבוד המאורע, זייענדיג מציין לשבח די חשובע עוסקים במלאכת הקודש, אז אן די נאכאנאנדע הארעוואניע קומט גארנישט צופיס.
ספעציעלע בריוון זענען ערשינען פון עטליכע גדולי ישראל, א מכתב קודש פון כ"ק אדמו"ר מבאיאן שליט"א, א בריוו פון הגאון הגדול רבי משה הלל הירש שליט"א ראש ישיבת סלאבאדקע, און א בריוו פון הגאון הגדול רבי מאיר צבי בערגמאן שליט"א. די מכתבי קודש זענען געווארן פארגעליינט ביים גרויסן מעמד, דורך הרה"ג ר' נפתלי אופמאן שליט"א בעלזא דיין אין הר יונה.
דורכאויס די גייסטרייכע מעמד וואס איז אפגעראכטן געווארן אין די גיגאנטישע זאלן פון בניני האומה אין ירושלים, האט מען געהערט די צענטראלע דרשה פון הגה"צ ר' אהרן מרדכי רוקח שליט"א בנו יחידו פונעם רבי'ן, און א רירנדע דרשה פון כ"ק אדמו"ר מנאראל שליט"א מזקני חסידי בעלזא. אויך האט מען געהערט א רייע דרשות מפי מגידים מפורסמים, הרה"ג ר' פנחס פריעדמאן שליט"א ראש הכוללים דבעלזא, און הרה"ג ר' מנשה ישראל רייזמאן שליט"א.
צום הויכפונקט פונעם מעמד האט מען מכתיר געווען נייע דיינים אינערהאלב קהילה קדושה מחזיקי הדת, און געמאלדן איבער פרישע פראיעקטן צו פארשטערקערן דעם יסוד הקהילה, ווען עס איז אויפגענומען געווארן הנגיד המפואר ר' אלי' קליין הי"ו פון ירושלים צו שטיין אין שפיץ פון די נדיבי עם, און טראגן דעם טיטל "נציב קהל מחזיקי הדת".
