שאקירנדע נייעס ווערט יעצט אויפגענומען אין שיכון סקווירא, אז איינער פון די חשובע דיינים אין שטעטל הרה"ג ר' יצחק שפיטצער ז"ל איז פלוצלינג נפטר געווארן נאכן ליידן פון א הארץ אטאקע רח"ל, שטייענדיג אינמיטן א הלכה'דיגע שמועס ביים כשר'ן א מקוה אין סקווירא שטעטל.
דער דיין הרה"ג ר' יצחק שפיטצער איז געווען א זון פון הרב החסיד הישיש ר' משה גדלי' שפיטצער ע"ה, און א איידעם ביי הרב החסיד ר' בנציון ליכטער ע"ה, א ברודער פון כ"ק אדמו"ר מכוונת הלב זצ"ל. ער איז געווען באקאנט מיט זיין התמדה וגדלות בתורה, און געשטיגן בדרכי ההוראה אויף א שטארקע פארנעם, ווערנדיג פאררעכנט צווישן די גרעסטע מורי הוראה אין שטעטל.
בפרט איז געווען באקאנט זיין קלארע פסקים און הוראות בעניני מקוואות און עירובי תחומין, אין וואס ער האט זיך ספעציעליזירט און ארויסגעגעבן חידושים און תשובות אין די הונדערטער נומערן, זייענדיג מורה הלכה בישראל פאר אידישע קינדער סיי אין סקווירא שטעטל און איבער די גאנצע וועלט. אזוי אויך איז ער געווען א שטארקע מומחה בעניני סת"ם, אליינס געווען א סופר און אויפגעטון פאר אנדערע אין דעם געביט.
היינט פארמיטאג איז דער דיין ארויף צו איינעם אינדערהיים אין סקווירא שטעטל צו געבן די השגחה אויף א מקוה, און שטייענדיג אינמיטן א הלכה'דיגע שמועס איז ער פלוצלינג צוזאמגעפאלן רח"ל נאכן ליידן פון א הארץ אטאקע ה"י, חברה הצלה האט געארבעט אויף אים א שטיק צייט אבער ליידער אן ערפאלג, ביזן באשטעטיגן די שרעקליכע בשורה אז שבק חיים לכל חי, אין עלטער פון זיבן און זעכציג יאר, איבערלאזנדיג א הערליכע דור, חשובע קינדער תלמידי חכמים און מרביצי תורה.
די מסע הלוויה וועט פארקומען 3:30 נאכמיטאג פארנט פון ביהמ"ד הגדול אין שיכון סקווירא, וואו על פי הוראת הקודש פון כ"ק אדמו"ר מסקווירא שליט"א וועלן די תלמידי הישיבות הקדושות ארויסקומען אפגעבן דעם כבוד האחרון פארן אחד המיוחד שבחבורה, מגדולי מורי ההוראה אין סקווירא שטעטל.
