די באקאנטע "בארא פארק מצה בעקעריי" איז די נאכט טאטאל פארניכטעט געווארן אין העלישע פלאמען, נאך וואס א פייער האט אויסגעבראכן אין די געביידע אינמיטן די נאכט, און איז דערווייל נאכנישט פולקאם געברענגט געווארן אונטער קאנטראל.
די פייער האט זיך אנגעהויבן נאך צוויי אזייגער ביינאכט, אין די געביידע פון די מצה בעקעריי אויף די דרייצנטע עוועניו ביי די זעקס און דרייסיגסטע סטריט, א מאסיווע רעאקציע פון פייערלעשער האט זיך אנגעזעהן אויפן סצענע, אין די צייט וואס א טייל פון די געביידע איז איינגעפאלן פון די שווערע פלאמען.
נאך א שעה צייט האבן די פייערלעשער געברענגט די פייער אונטער קאנטראל, אבער א שעה צוויי דערויף האט עס ווידער אנגעהויבן ברענען, און יעצט פארמיטאג איז די פייער נאך אלס נישט פולקאם פארלאשן, שאפנדיג א ערנסטע אנזעץ אויף די גאנצע געגנט ארום.
נאנט צו צוויי הונדערט פייערלעשער האבן רעאגירט צו די סצענע, איין פייערמאן און נאך עטליכע זענען פארוואונדעט געווארן, אבער עס ווערט נישט באריכטעט קיין ערנסט פארוואונדעטע. די שטארקע פלאמען און שווערע רויעך האט פארלאנגט א גרויסע צאל עמערדזשענסי הילף, אריינגערעכנט דורך העליקאפטער פון אויבן, און די רויעך האט זיך פארשפרייט אויפן גאנצן האריזאנט דורכאויס די נאכט.
א שטארקע קידוש השם האט זיך אנגעזעהן היינט צופרי, ווען דער בעל הבית פון די מצה בעקעריי האט פארטיילט פאר אלע צושויער א קליינע קארטל מיט א שטארקע אמונה סטעיטמענט, אז אפילו ווען עס זעהט אויס שלעכט איז אבער אלעס פון באשעפער, און אויב קומט עס פונעם הייליגן באשעפער איז עס דאך גוט, ווייל אין עוד מלבדו.
