בחצר הקודש פאפא איז אין די יעצטיגע טעג געלאזט געווארן אין גאנג א ערנסטע אונטערנעמונג ארויסצוהעלפן די חברי הקהילה בעת שמחתם, ווען עס איז אוועקגעשטעלט געווארן די נייע מפעל "שמחות תמיד", וואס פאראייניגט די טויזענטער חסידים אין א געמיינזאמע פארמאט צו אריינלייגן געלט און עס פארדינען בעת משוש.
א גרויסע אסיפה מיטן נאמען "צוזאמען" איז פארגעקומען פארלאפענע וואך מיטוואך ויגש ליל ניטל, אין די גרויסע קאנטינענטאל זאלן אין וויליאמסבורג, און איז באשיינט געווארן דורך די קינדער פון רבי'ן שליט"א הרבנים הגאוה"צ שליט"א און די דייני ורבני הקהלה שליט"א. מען האט געהערט דעם דבר האסיפה פון הגה"צ ר' פנחס חיים גרינוואלד שליט"א רב דחסידי פאפא אין מאנסי בן כ"ק אדמו"ר מפאפא שליט"א, איבער די אחריות פון יעדן יחיד צו טון למעשה. ווי אויך האט מען געהערט די פונטקליכע דעטאלן פונעם מפעל דורך הרב יואל פריעדמאן שליט"א מגי"ש בישיבה גדולה קרית פאפא. דערנאך איז פארגעקומען א רייכע פאנעל דורך די חשובע עסקני הקהלה מוה"ר יעקב יוסף טויבער ני"ו, מוה"ר יואל קאלמאן ני"ו און מוה"ר יוסף אבערלאנדער ני"ו.
די עסקנים האבן אויסגעשמועסט די גענויע דעטאלן, א דעטאלירטע בראשור וואס ערקלערט די גאנצע מהלך וויאזוי די נייע מפעל וועט ארבעטן, ווען יעדער אינגערמאן וועט אריינלייגן א סכום פון צוויי הונדערט און פערציג דאללער א חודש, אפגעזעהן וויפיל קינדער עס איז דא אין שטוב, און ביי יעדע קינד וואס מען מאכט חתונה וועט מען קענען געניסן פון א הלוואה פון גאנצע פופציג טויזענט דאללער, וואס וועט ערמעגליכט ווערן מיט צוגענגליכע באצאלונגען דורכאויס צענדליגע יארן.
מפעל שמחות תמיד איז געגרינדעט געווארן בברכתו ובעידודו פון כ"ק אדמו"ר מפאפא שליט"א, און עס ווערט באגלייט דורך די רבני הקהילה, און א וועד הנאמנים און עסקנים וואס האבן דאס אויסגעארבעט על פי חוקי המדינה. אין די יעצטיגע טעג טוען שוין טויזענטער חסידים זיך איינשרייבן צו זיין א טייל דערפון, סיי ארויסצוהעלפן אנדערע בעת שמחה, און סיי צו קענען חתונה מאכן די אייגענע קינדער בדרך כבוד מיט הרחבת הדעת.
