בחצר הקודש וויזניץ איז אין די יעצטיגע טעג פראקלאמירט געווארן א אייגענארטיגע אונטערנעמונג דורך די עסקני הקהילה, איינצופעדימען א פרישע פראיעקט וואס זאל צוהעלפן די טויזענטער חסידים בעת שמחתם, איבערהויפט ווען עס דערנענטערט זיך די פרייליכע טעג פון חתונה מאכן א קינד, עס זאל אריבערגיין מיט הרחבת הדעת בשעה טובה ומוצלחת.
קהילה קדושה וויזניץ ציילט זיך עטליכע טויזענט משפחות לענגאויס גאנץ ארץ ישראל, סיי די טויזענטער משפחות אין קרית וויזניץ בני ברק, און סיי די טויזענטער משפחות פון אנדערע שטעט. די עסקני הקהילה קוקן שוין לאנג אריין אין א פראיעקט צו ארויסהעלפן די חסידים בעת שמחתם, און אצינד איז טאקע אפירגעקומען דעם געדאנק אין צוזאמענארבעט מיט די "גמ"ח הקהילה" דחסידי בעלזא, וואס איז שטארק מצליח אין דעם געביט.
אין צוויי וואכן ארום ראש חודש שבט, וועט פארקומען א גרויסארטיגע אסיפה פאר כלל חסידי וויזניץ בארה"ק, אין די גיגאנטישע בניני האומה זאלן אין ירושלים, וואו עס וועט פארגעשטעלט ווערן די פלענער פון עזרת נישואין, וויאזוי מען קען זיך אויסרעכענען פון פריער, און אריינלייגן געלט צו קענען חתונה מאכן מיט הרחבת הדעת, סיי דורך אינוועסטמענט און סיי דורך הלוואות, ווי עס וועט ווערן אויסגעשמועסט ביים גרויסן אסיפה.
די אונטערנעמונג ווערט באגלייט בברכתו ובעידודו פון כ"ק אדמו"ר מוויזניץ שליט"א לרפו"ש, די רבני הקהילה און די קינדער פונעם רבי'ן, און אין די יעצטיגע טעג ווערט פארעפנטליכט די ערשטע דעטאלן איבער דעם גרויסן פראיעקט.
