אין א אייגענארטיגע שריט גרייט מען זיך בחצר הקודש וויזניץ צו א ספעציעלע שבת בצל הקודש, ווען כ"ק אדמו"ר מוויזניץ שליט"א לרפו"ש וועט פראווענען א שבת אויף א פארמאכטע פארנעם, בלויז מיט די בחורים יתומים פון די קהילה, וואס וועלן האבן די זכיה להסב על שולחן המלך און נהנה זיין פונעם רבינ'ס חיזוק און הדרכה.
דער וויזניצער רבי שליט"א וועלכער האלט זיך אויף אין מושב אורה נעבן ירושלים לצרכי רפואה, פראוועט רוב שבתים דארט אין די אכסניא אויף א פארמאכטע פארנעם, בלויז מיט די מקורבים און די בני המשפחה, אצינד איז געמאלדן געווארן אז דער רבי שליט"א האט אויסגעדרוקט רצון קדשו איינצולאדענען די בחורי החסידות וואס זענען יתומים, און פארברענגען מיט זיי אויף א שבת כשהמלך בשדה.
דעם שבת פרשת ויחי וועלן די בחורים יתומים וויילן ביים רבי'ן בבית האכסניא, וואו עס ווערט צוגערישט א באקוועמע אכסניא פאר די בחורים, און זיי וועלן האבן די זכיה צו זיין דעם רבינ'ס מנין, אנשטאט די געווענליכע מקורבים און בני המשפחה, זיי וועלן האבן די זכיה צו עסן די סעודות שבת ביים רבינ'ס טיש און הערן דברי חיזוק והדרכה דורכאויס דעם גאנצן שבת.
