היינט איז באשטעטיגט געווארן מטעם בית כ"ק אדמו"ר מפאפא שליט"א, אז דער רבי שליט"א וועט בעז"ה פראווענען א געהויבענע שבת בקרב חסידיו אין שטאט מאנסי, מחזק צו זיין קהל עדת צאן מרעיתו און צוזעהן פונדערנאנט די בליה און וואוקס אין די קהילה און מוסדות דחסידי פאפא אין מאנסי.
דאס קומט גאנצע פיר יאר זינט דער רבי שליט"א האט דאס לעצטע מאל געפראוועט א שבת אין מאנסי, ווען עס איז ברוב פאר והדר באנייעט געווארן די פראכטפולע ביהמ"ד הגדול קהלת יעקב פאפא ביים ווינקל פון סוזען און ליאן דרייוו, צוברענגענדיג א געוואלדיגע הרחבת הדעת פאר די הונדערטער חסידים תושבי העיר, וואס דערקוויקן זיך מיט דעם גרויסן ביהמ"ד אין יעדע געלעגנהייט.
אין די זעלבע צייט האט די פאפא קהילה אין מאנסי זיך שטארק פארשפרייט די לעצטע פאר יאר, מיטן עפענען נאך שטיבלעך אין פארשידענע געגנטער, און אצינד גרייט מען זיך צו נאכאמאל מקבל זיין את פני הקודש, ווען כ"ק אדמו"ר מפאפא שליט"א וועט אנקומען אויף א געהויבענע באזוך פון עטליכע טעג קיין מאנסי, און באזוכן אין אלע אפטיילונגען פון די קהילה און מוסדות בתוככי העיר.
צום הויכפונקט וועט דער רבי שליט"א פראווענען א געהויבענע שבת מיט די חסידים תושבי העיר, באשטימט אויף שבת פרשת שמות, בעוד שבועיים ימים, און די עסקנים ווארפן זיך אריין אצינד אויסצוארבעטן אלע דעטאלן על צד היותר טוב.
