שטייענדיג בעפאר די דרייצנטע הילולא קדישא פון כ"ק אדמו"ר מסאדיגורא זצ"ל בעל עקבי אבירים, איז באשטעטיגט געווארן די פלענער אויף א ספעציעלע שבתא דריגלא בחצר הקודש סאדיגורא, ווען כ"ק אדמו"ר מסאדיגורא שליט"א וועט פראווענען א שבת בהיכלא קדישא אינעם אלטן סאדיגורא קלויז אין תל אביב, באותו מקום וואו דער רבי זצ"ל דער בעל ההילולא האט אפגעראכטן די עבודת הקודש בחיים חיותו.
ווי באקאנט האט דער סאדיגורא רבי זצ"ל בעל עקבי אבירים אנגעפירט דעם שיינעם הויף אין תל אביב, זייענדיג ממלא מקום אביו הרה"ק בעל כנסת מרדכי מסאדיגורא זצ"ל וועלכער האט געוואוינט אין תל אביב. אויף די עלטערע יארן האט דער סאדיגורא רבי זצ"ל בעל עקבי אבירים איבערגעפלאנצט דעם הויף קיין בני ברק, וואו עס בליהט און וואקסט ביזן היינטיגן טאג, תחת דגלו והדרכתו פון נכדו כ"ק אדמו"ר מסאדיגורא זצ"ל.
די אלטע קלויז אין תל אביב איז ווייטער א תל תלפיות פאר פילצאליגע חסידישע אידן תושבי השכונה, און יעדעס יאר ביומא דהילולא קדישא פונעם עקבי אבירים טוט דער סאדיגורא רבי שליט"א פראווענען א מסיבת לחיים אינעם קלויז אינאיינעם מיט די ארטיגע מתפללים וחברי הקהילה.
אצינד גרייט מען זיך אויף א געהויבענע שבת וואס דער רבי שליט"א וועט פראווענען אין תל אביב, צום צווייטן מאל נאכן איבערנעמען די כתר האדמורו"ת, ווען דאס לעצטע מאל איז געווען מיט דריי יאר צוריק, אויך ביים שבת יארצייט פון הרה"ק בעל עקבי אבירים זצ"ל. די שבתא דריגלא וועט פארקומען קומענדיגע וואך פרשת שמות, בלויז צוויי טעג נאך די הילולא קדישא וואס געפאלט דאנערשטאג י"ט טבת.
צוליב מאנגל אין פלאץ אינעם אלטן קלויז, וועט די שבת זיין געווידמעט בלויז פאר די חסידים פון תל אביב, די זקני החסידים, און די יונגע אינגעלייט וואס האבן חתונה געהאט פון תשס"ח ביז תשע"ו. די עסקנים ארבעטן צוצושטעלן אש"ל מלא פאר די ערלויבטע געסט, סיי אין ארומיגע דירות, און סיי אין בניני המוסדות אין די געגנט.
