א מעכטיגער קידוש שם שמים האט אפגעהילכט היינט אווענט ברחובה של עיר בפלטרין של מלך, אויף די פארנומענע גאסן אין ירושלים עיר הקודש, ווען צענדליגע טויזענטער אידן זענען ארויסגעקומען אין מאסן אויסצושרייען א קול מחאה וזעקה, קעגן די שרעקליכע רדיפת הדת בארץ הקודש, די גזירת הגיוס וואס טוט ליידער אריינשלעפן בחורים אין מיליטער אדער אין טורמע, און די חוק הגיוס וואס ווערט באטראכט אין די יעצטיגע טעג.
כולם נקבצו ובאו, פון אלע שטעט לענגאויס ארץ ישראל איז מען געקומען צו פארן, און די הויפט גאסן פון ירושלים, רחוב ירמיהו און ארום, איז געווארן פולקאם פארשלאסן פאר טראפיק פארקער, זייענדיג איבערגעפולט פאר לאנגע שעות מיט שווערע טויזענטער אידן פון אלע שיכטן און קרייזן.
בראש הנאספים זענען געזעהן געווארן גדולי האדמורי"ם והרבנים ומנהיגי הדור, ביי א גרויסע בימת הכבוד וואו עס זענען אויך געשטאנען די בעלי דרשנים, צווישן אנדערע האבן זיך אנגעזעהן די גדולי חכמי ספרד, ובראשם הגאון הגדול רבי משה צדקה שליט"א, מרנן ורבנן שרי התורה חברי ביד"ץ העדה החרדית, ובראשם דער פוסק הדור מרא דארעא קדישא שליט"א, הגה"צ ר' יעקב מאיר שעכטער שליט"א, און עטליכע גדולי ראשי ישיבות פון די ליטווישע קרייזן.
צווישן די פילע אדמורי"ם וואס האבן זיך באטייליגט איז געזעהן געווארן כ"ק האדמורי"ם מסלאנים, דושינסקיא, בוהוש, משכנות הרועים, קרעטשניף פון ירושלים, קהל חסידי ירושלים, סאסוב, שבט הלוי, תורת חכם, טשארנאביל, חוג חתם סופר, ספינקא, טעמעשוואר, סטראפקוב, זידטשויב ווערעצקי, סטריקוב ירושלים, שומרי אמונים, וואסלוי, דעעש ירושלים, קרעטשניף טשערנאוויץ, און ברעזאן.
די עצרת האט זיך אנגעהויבן מיט אמירת פרקי תהלים און סליחות, און דערנאך האט דער יושב ראש העצרת הרה"ג ר' ברוך שווארץ שליט"א אויפגעטרעטן מיט א פייערדיגע דרשה. דערנאך האט אויפגעטרעטן הרב אברהם יחיאל אונא שליט"א פון די בני תורה קרייזן, און מען האט געהערט פייערדיגע ווערטער פון הגאון הגדול רבי יהושע דוד טורטשין שליט"א מנהיג קהילת הפרושים.
דאן האט מען געהערט א דרשה פון הגאון הגדול רבי עזריאל אויערבאך שליט"א, און פונעם פוסק הדור מרא דארעא קדישא, צום שלוס האט הגאון המקובל רבי יעקב עדס שליט"א פארגעזאגט שמע קולנו, און הגה"צ רבי יעקב מאיר שעכטער שליט"א האט פארגעזאגט קבלת עול מלכות שמים.
