יעצט ביינאכט אין ארץ ישראל איז פארגעקומען א געמיינזאמע אסיפה דורך די גדולי האדמורי"ם חברי מועצת גדולי התורה פון אגודת ישראל, וועלכע זענען זיך צוזאמגעקומען דורכשמועסן די ברענענדיגע נושא איבער די גזירת הגיוס, און וויאזוי זיך אומצוגיין מיט די פארגעשלאגענע חוק הגיוס וואס ווערט באטראכט אין די ארטיגע רעגירונג.
ביים אסיפה האבן זיך באטייליגט די חברי המועצת, כ"ק האדמורי"ם מבעלזא, גור, וויזניץ, באיאן, צאנז, סערט וויזניץ, און מודזיץ שליט"א, אינאיינעם מיט עטליכע עסקנים און פארשטייער. כ"ק אדמו"ר מסלונים שליט"א האט געשיקט א פערזענליכע מכתב קודש צו די אסיפה וואו ער דרוקט אויס די קלארע קעגנערשאפט צו אקצעפטירן סיי וועלכע געזעץ וואס שטעלט ארויף שטראפן און סאנקציעס אויף לומדי תורה, און כ"ק אדמו"ר מביאלא שליט"א וועלכער איז אויך א חבר אין די מועצת האט זיך נישט באטייליגט, זייענדיג אין אמעריקע לטובת מוסדותיו הקדושים.
ארגינעל איז געווען געפלאנט אז די אסיפה וועט פארקומען במעון הנופש פון כ"ק אדמו"ר מוויזניץ שליט"א לרפו"ש אין מושב אורה נעבן ירושלים, אבער נאך וואס כ"ק אדמו"ר מבעלזא שליט"א האט אויסגעדרוקט זיין שטארקע רצון זיך צו באטייליגן, איז די אסיפה פארגעקומען אין די זאל פון בית מלכה אין ירושלים.
