אלפי חסידי גור נעמען אויף מיט א שווערן געמיט די ביטערע בשורה, איבער די פטירה בשיבה טובה פון הרב החסיד המפורסם ר' מענדל בינקה ז"ל, לאנגיעריגער גבאי און משמש בקודש בחצר הקודש גור, וועלכער איז יעצט נאכמיטאג אין ארץ ישראל נפטר געווארן אין עלטער פון פיר און ניינציג יאר.
הרב החסיד ר' מענדל ע"ה איז געווען א זון פון הרב החסיד ר' יהושע נח בינקה ז"ל, וועלכער האט אויך געדינט אלס גבאי אין ביהמ"ד הגדול גור אין ירושלים, געבוירן איז ער אין שטאט קאליש אין פוילין, און אלס קליין קינד איז זיין משפחה אנגעקומען קיין ארץ ישראל און זיך באזעצט אין ירושלים עיה"ק.
אין יענע תקופה ווען הרה"ק בעל אמרי אמת מגור זי"ע איז אנגעקומען קיין ארץ ישראל, איז ר' מענדל באלד געווארן פון די פרחי החסידים און זיך געווייקט במחיצתו, זיין פאטער ר' יהושע נח איז שוין דאן געווארן אויפגענומען אלס גבאי אין די גערער בית המדרש, און האט פאר צענדליגע יארן משמש געווען בנאמנות מיט די הונדערטער חסידים, ביז עס איז אויסגעשטיגן אלס א מאסיווע אימפעריע פון טויזענטער חסידים.
ר' מענדל איז אלע יארן געווען געטריי פאר די גערער הויף, פאר די רבי'ס לדורותיהם און פאר אלע חסידים, אין יאר תשס"ח איז ער געווארן אפיציעל אויפגענומען אלס צענטראלער גבאי אין ביהמ"ד הגדול דחסידי גור אין ירושלים, נאכן פטירה פון דער באקאנטער משמש בקודש לבית גור הרב החסיד ר' חנינא שיף ז"ל, וועלכער האט ערפילט די גבאות פאסטן נאכן פטירה פון ר' מענדל'ס טאטע הרב החסיד ר' יהושע נח בינקה ז"ל.
אין די לעצטע פאר יאר זינט ר' מענדל איז ליידער געווארן שוואך, האט מען אויפגענומען עטליכע אונטער גבאים, דארונטער דער משמש בקודש ביי כ"ק אדמו"ר מגור שליט"א הרב לייבל פעזינטשעווסקי שליט"א, און מיט עטליכע חדשים צוריק בעפאר די ימים הנוראים איז אויפגענומען געווארן א נייער הויפט גבאי אין ביהמ"ד הרב החסיד ר' יוסף שיף שליט"א א זון פונעם לעגענדארער גבאי ר' חנינא ז"ל.
דער חשובער גבאי ר' מענדל לאזט איבער א הערליכע דור ישרים יבורך, און טויזענטער חסידי גור וואס טרויערן נאך די שווערע פארלוסט. די לוויה וועט פארקומען היינט אויפדערנאכט ניין דרייסיג פארנט פון ביהמ"ד הגדול דחסידי גור אויף רחוב ירמיהו אין ירושלים.
