מיט שאק און טרויער ווערט אויפגענומען די ביטערע בשורה פון ירושלים עיר הקודש, איבער די פלוצלינגדיגע פטירה פון הגה"צ המפורסם חסידא ופרישא, הגאון הגדול רבי יעקב מענדיל יאראוויטש זצ"ל, לאנגיעריגער חבר הביד"ץ אין די עדה החרדית, וועלכער איז היינט שבת פארטאגס נפטר געווארן אין עלטער פון דריי און זיבעציג יאר.
דער רב זצ"ל איז געווען א זון פון הגאון החסיד ר' אהרן יאראוויטש זצ"ל, אלס בחור האט ער געלערנט אין די סאטמארע ישיבה אין ניו יארק, בצל הקודש פון הרה"ק מסאטמאר זי"ע, צו וועם ער איז געווען אדוק ומקושר כל ימי חייו. שפעטער איז ער געפארן קיין ארץ ישראל לערנען אין ישיבה הקדושה תולדות אהרן, וואו ער האט זיך מקשר געווען צו מורו ורבו כ"ק אדמו"ר מתולדות אהרן זצ"ל, און בהגיעו לפירקו איז ער געווארן אן איידעם ביי הרב החסיד ר' שלמה פאפענהיים זצ"ל סגן יו"ר הנהלת העדה החרדית.
דער רב זצ"ל איז געווען א אויסגערופענער תלמיד חכם צענדליגע יארן און מרביץ תורה געווען פאר תלמידים אין די ישיבות דחסידי דושינסקיא און תולדות אהרן, ווי אויך האט ער מרביץ תורה געווען אין כולל שומרי החומות אין ירושלים עיה"ק. דער רב זצ"ל איז געווען פון די חשובע רבנים בחצר הקודש תולדות אהרן, און לאנגע יארן משפיע געווען פאר חברי קהילה קדושה דושינסקיא.
זיין ראלע אלס דיין אין די עדה החרדית האט זיך אנגעהויבן מיט גענוי פערציג יאר צוריק, צוערשט איז ער געווען א מו"ץ און געענטפערט שאלות פאר אידישע קינדער, און מיט צוואנציג יאר צוריק נאכן פטירה פון הגה"צ ר' משה האלבערשטאם זצ"ל חבר ביד"ץ העדה החרדית, איז ער געווארן אויפגענומען אלס חבר הביד"ץ, און אלס רב פון די בית ישראל געגנט מטעם העדה החרדית.
פארגאנגענע וואך איז ער אריבער א הארץ פראצעדור אין שפיטאל, און נאך וואס זיין מצב האט זיך פארבעסערט איז ער דעם פרייטאג באפרייט געווארן פון שפיטאל, פרייטאג צונאכטס האט ער נאך געפראוועט די סעודת ליל שבת אינאיינעם מיט די בני המשפחה, אבער ליידער איז ער פלוצלינג נפטר געווארן באשמורת הבוקר, צום טיפן צער און שאק פון גאנץ כלל ישראל, ידידיו ומכיריו.
די לוויה איז פארגעקומען היינט מוצאי שבת קודש פארנט פון די בניני העדה החרדית כיכר זופניק, דערנאך פארנט פון ביהמ"ד הגדול תולדות אהרן, און ער איז געקומען לקבורה אויפן הר הזיתים.
וכל בית ישראל יבכו את השריפה אשר שרף ה'.
