מיט שווערע געמיטער איז אנגעקומען היינט די ביטערע בשורה איבער די פטירה פון האי גאון וחסיד חסידא ופרישא, הגה"צ רבי אשר גרינפעלד זצ"ל רב חסידי וויזניץ אין מאנטריאל, וועלכער איז נפטר געווארן נאך א שווערע קראנקהייט ל"ע, אין עלטער פון צוויי און אכציג יאר.
הגאון ר' אשר זצ"ל איז געווען א זון פון הרב החסיד ר' ברוך גרינפעלד ז"ל, און א איידעם ביי הרב החסיד ר' יצחק ישכר וויזל ע"ה. אין זיינע יונגע יארן איז ער אויפגעוואקסן אין זיין היימשטאט שווייץ, און האט זיך שוין דעמאלטס מקשר געווען צו צדיקי בית וויזניץ. אלס בחור האט ער געלערנט אין ישיבת חכמי לובלין וואו ער איז געווען פון די חשוב'סטע תלמידים ביי הגה"ק בעל שבט הלוי זי"ע, תמידין כסדרן האט ער זיך מסתופף געווען בצל הקודש פון הרה"ק בעל אמרי חיים מוויזניץ זי"ע, און געווען פון די גאר נאנטע מקורבים ביי הרה"ק בעל ישועות משה מוויזניץ זי"ע.
אין יאר תשמ"ו איז ער ארויסגעפארן קיין מאנטריאל לכהן פאר אלס רב פון די וויזניצע קהילה, מיט די פערזענליכע בקשה פון מורו ורבו הרה"ק בעל ישועות משה זי"ע. ער האט אוועקגעשטעלט א כולל פאר אינגעלייט און באגלייט די קהילה נאה פאר צענדליגע יארן מיט א אויסטערלישע געטריישאפט, אויפגעהויבן די אינגעלייט בתורה וחסידות און זיי מדריך געווען להוראה, זייענדיג פון די גרעסטע תלמידי חכמים אין שטאט.
אלע יארן איז ער געשטאנען כחומה בצורה צו משפיע זיין אויף די חסידים און חברי הקהילה, כאוות נפשם הטהורה פון די וויזניצע רביים לדורותיהם, און בפרט די לעצטערע יארן ווען ער איז געשטאנען מיט גרויס געטריישאפט לימינו פון כ"ק אדמו"ר מוויזניץ שליט"א זייענדיג פון די חשובס'טע רבנים אין די קהילה.
ליידער איז ער נישט געזונט געווען די לעצטע תקופה, וויילענדיג אין קליוולאנד לצרכי רפואה, און היינט פארטאגס איז ער נפטר געווארן לחיי העולם הבא, שליסנדיג א לאנגיעריגע קאפיטל פון הרבצת תורה וחסידות אויף א שטארקן פארנעם, איבערלאזנדיג א שיינעם דור יראים ושלמים.
די לוויה וועט פארקומען היינט נאכמיטאג ביי ביהמ"ד אמרי חיים וויזניץ אין מאנטריאל, די מיטה וועט געפירט ווערן קיין ארץ ישראל לקבורה, וואו די לוויה וועט פארקומען פרייטאג אינדערפרי אין ביהמ"ד הגדול וויזניץ אין בני ברק, אויפן וועג צום וויזניצע בית החיים אין בני ברק.
