מיט גרויס צער און טרויער ווערט באוויינט די ביטערע אבידה, מיט די פטירה בשיבה טובה פון הרבנית הצדיקת מסיגעיט ע"ה, אשת חבר כ"ק הגה"צ גאב"ד סיגעיט זצ"ל, וועלכער איז היינט פארטאגס נפטר געווארן אין טיפן עלטער פון איין און ניינציג יאר, איבערלאזנדיג א הערליכע דור ישרים, בנין וחתנין רבנן, גדולי מורי הוראה אדמורי"ם רבנים וראשי ישיבות וואס באשיינען דעם אויבן אן אין די חסידישע וועלט.
די חשובע נפטרת הרבנית לאה רילא מייזליש ע"ה איז געווען א טאכטער פון הגאון החסיד ר' בנימין חיים פעלדמאן ז"ל, פון די נאנטע תלמידים ביי הגאון המפורסם רבי מאיר שפירא זצ"ל ראש ישיבת חכמי לובלין, וועלכער האט זוכה געווען צו גאר חשובע איידימער מגדולי הרבנים, כ"ק גאב"ד ירושלים זצ"ל בעל שערי טוביה, כ"ק גאב"ד סיגעיט זצ"ל, הגה"צ אבד"ק אשוואר זצ"ל, און להבחל"ח הגה"צ ר' נחום מאיר גערמאן שליט"א ריש מתיבתא ד'באבוב.
בהגיעה לפירקה האט זי חתונה געהאט מיט איר חשובער מאן הגה"צ רבי יקותיאל יהודה מייזליש זצ"ל גאב"ד סיגעיט, וועלכער איז געווען דער עלטסטער זון פון הגה"ק מווייטצען זצ"ל בעל בנין צבי, צענדליגע יארן איז זי צוגעשטאנען צו זיין רעכטע האנט מיט א געוואלדיגע איבערגעבנקייט, און געווען א ריכטיגע עזר מקודש ער זאל קענען מרביץ תורה זיין פאר תלמידים און אנפירן דעם שיינעם קהילה "קהל יראים" אין סיגעיט, ביז צו זיין פטירה מיט צוויי יאר צוריק.
די רעבעצין ע"ה לאזט איבער א הערליכע דור פון בנין וחתנין רבנן, דארונטער אייניקלעך און אור אייניקלעך וואס זענען משמש ברבנות ובהוראה, און טוען מרביץ תורה זיין לעדרים ואלפים, די זיהן זענען הגה"צ ר' דוד דוב מייזליש שליט"א גאב"ד סיגעיט, הגה"צ ר' יעקב שלמה מייזליש שליט"א אבד"ק לימינוב, הגה"צ ר' יוסף משה מייזליש שליט"א אבד"ק לאסק, הגה"צ ר' פנחס מרדכי מייזליש שליט"א דומ"ץ קהל יראים סיגעיט, און הגה"צ ר' שמעון זאב מייזליש שליט"א רב ביהמ"ד ישמח משה אין קרית יואל.
די איידימער זענען הגה"צ ר' יעקב אלי' אונסדארפער שליט"א אבד"ק מתיבתא ראשית חכמה אין מאנטריאל, הגה"צ ר' יחזקאל מייזליש שליט"א אבד"ק אוהעל וומס"ב, כ"ק אדמו"ר מדושינסקיא שליט"א, הגה"צ ר' יחזקאל הורוויץ שליט"א אבד"ק קנין תורה שטראסבורג, הגה"צ ר' אשר אנשיל שעהר שליט"א אבד"ק קלעסאן, און הגה"צ ר' אברהם יודא לעוו שליט"א גאב"ד תפארת אליעזר.
די לוויה איז באשטימט אויף היינט מיטאג צוועלף אזייגער, ביי ביהמ"ד קהל יראים אין סיגעיט, נאך די הספדים וועט די מיטה געפירט ווערן קיין ניו דזשערזי, וואו זי וועט קומען לקבורה אויפן בית החיים דקהל יטב לב ד'סאטמאר, נעבן איר גרויסער מאן דער סיגעיטער רב זצ"ל.
יהא זכרה ברוך.
