בצאת השבת הערט מען גאר דראסטישע נייעס פון די מיטל מזרח, איבער א מאסיווע מלחמה וואס אמעריקע האט אונטערגענומען צוזאמען מיט מדינת ישראל צו אטאקירן איראן און אונטערברענגען די רעזשים, א מלחמה וואס האט ווי פארשטענדליך געצויגן שטארקע רעאקציעס, הויפטזעכליך א שווערע איבערלעבעניש פאר אחינו בני ישראל בארץ הקודש וואס זענען געקומען אונטער א מאסיווע באראדזש פון מיסילס דורכאויס היינט שבת קודש.
היינט צופרי אכט פופצן אויף די ארטיגע זייגער איז אריין אין קראפט די מאסיווע מיליטערישע אפעראציע קעגן איראן, אין א געמיינזאמע צוזאמענארבעט פון די אמעריקאנער מיליטער און מדינת ישראל, ווען צום אלעם ערשט האט מען אומגעברענגט און סוקסעספול עלימינירט דער ארכי מערדער און צורר היהודים, דער איראנער גייסטליכער פירער אייאטאעלי כאמענאי, אינאיינעם מיט נאך צענדליגע פון זיינע געהילפן, הויכראנגיגע קאמאנדירן, מיליטערישע פירער, צוקונפטיגע פירער און נאך פיל.
די אטאקע איז געווארן דורכגעפירט דורך באמבאדיר פליגער פון אמעריקע צוזאמען מיט מדינת ישראל, געביידעס זענען באמבאדירט געווארן און ריזיגע איראנער קאמפלעקסן זענען געווארן חרוב. די אטאקעס האלט נאך אן יעצט ביינאכט, שוין באלד א גאנצע מעת לעת זינט עס האט זיך אנגעהויבן, און פרעזידענט טראמפ זאגט אז ווילאנג עס וועט אויספעלן וועט די אטאקע אנגיין מיט א שטארקייט.
ווי ערווארטעט האט איראן אנגעהויבן צוריקשיסן קיין מדינת ישראל און צו אמעריקאנער באזעס אין די מיטל מזרח, קיין ארץ ישראל איז געקומען צו פליען ארום הונדערט און פופציג מיסילס, וואס מייסטנס דערפון איז געווארן אראפגעשאסן אדער געלאנדעט אין אפענע שטחים, עטליכע מיסילס און דראונס האבן יא באטראפן געביידעס אין גרויסע שטעט, ווייניגסטנס איין מענטש איז אומגעקומען אין תל אביב, און נאך אנדערע זענען פארוואונדעט געווארן פון שראפנעל.
ווי פארשטענדליך זענען די לופט רוימען אין ארץ ישראל געווארן פארשלאסן, אזוי אויך אין ארומיגע אראבישע לענדער וואו ציווילע פליגער זענען נישט ערלויבט. אין די זעלבע צייט ווערט ארויסגעהויבן די פאקט אז א צאל אראבישע לענדער האבן זיך פולקאם צוגעשטעלט צו שטיצן אמעריקע און מדינת ישראל מיט די אטאקעס אויף איראן.
אמעריקאנער באזעס אין דערנעבענדיגע אראבישע לענדער זענען אטאקירט געווארן דורך איראן, און פרעזידענט טראמפ האט דערקלערט אז טראץ וואס ער האט זיך געגרייט דערצו, איז די קאנטער אטאקעס געווען פיל שוואכער ווי מען האט זיך פארגעשטעלט, אויך זאגט דער פרעזידענט אז קיין איין אמעריקאנער זעלנער איז נישט אומגעקומען אין די קאנטער אטאקעס.
אידישע קינדער זענען מתפלל אז די מצב המלחמה זאל זיך בארואיגן און עס זאל נישט שאטן פאר קיין שום אידיש קינד, מען זאל שוין זוכה זיין צו התגלות כבוד שמים במהרה.
