היינט מיטוואך האט כ"ק אדמו"ר מוויזניץ שליט"א פון מאנסי זיך פארבינדן טעלעפאניש צו כ"ק אדמו"ר מגור שליט"א, און זיך אינטערסירט איבער די וואוילזיין פון חסידי גור אין ערד, שטייענדיג נאך די שרעקליכע מיסיל אטאקע וואס האט באטראפן די ארטיגע חסידים, ווען א מיסיל פון איראן האט געמאכט א דירעקט היט צווישן באוואוינטע הייזער פון חסידי גור אין ערד, פירנדיג צו צענדליגע פארוואונדעטע.
דער וויזניצער רבי שליט"א פון מאנסי פארמאגט א נאנטע קשר מיטן גערער רבי'ן שליט"א ווי באקאנט, און האט מיט עטליכע יאר צוריק אוועקגעגעבן בית מדרשו הגדול אין מאנסי אלס פאסיגע אכסניא פאר די גרויסער גערער חתונה וואס איז געפראוועט געווארן דא אין אמעריקע ברוב פאר והדר.
היינט נאך שחרית האט דער וויזניצער רבי זיך געוואנדן צו הנגיד החסיד ר' בערל קארניאל הי"ו מגדולי תומכי מוסדות וויזניץ, און פון די גרויסע תומכים בחצר הקודש גור, און געבעטן אז ער וויל רעדן מיטן גערער רבי'ן איבער די סיטואציע. די צווי אדמורי"ם האבן טאקע גערעדט אויפן טעלעפאן און דער וויזניצער רבי האט זיך אינטערסירט איבער די שווערע נאכווייען, און די פראדוקטיווע ארבעט פון די עסקנים ארויסצוהעלפן די באטראפענע משפחות וואס האבן ליידער נישט קיין דאך איבערן קאפ, און אויסגעדרוקט גרייטקייט ארויסצוהעלפן מיט וואס מעגליך.
