JDN

שמחת בית תולדות אברהם יצחק: דעם שבת קומט פאר די שמחת האויפרוף פון א אייניקל ביי כ"ק אדמו"ר מתולדות אברהם יצחק שליט"א, די חתן א זון פון זיין זון הגה"צ ר' דוד צבי קאהן שליט"א אבד"ק תולדות אברהם יצחק בית שמש, איידעם ביי כ"ק אדמו"ר מקרעטשניף סיגעט זצ"ל, מיט די כלה א טאכטער פון הרב חיים האגער שליט"א, זון פון הגה"צ ר' ארי' האגער שליט"א אדמו"ר מאנטוניא הורדענקא, און איידעם ביי הנגיד החסיד ר' אפרים זלמן בעק שליט"א פון שווייץ. – די שמחת האויפרוף קומט פאר אין ביהמ"ד הגדול תולדות אברהם יצחק אין ירושלים עיה"ק.

שמחת בית וויזניץ – קאלוב – ביקסאד: דעם שבת קומט פאר די שמחת האויפרוף פונעם חתן א זון פון הגה"צ ר' נפתלי מרדכי טויב שליט"א אב"ד קאלוב טשעסנאט רידזש, זון פון כ"ק אדמו"ר מקאלוב שליט"א, און איידעם ביי כ"ק אדמו"ר מוויזניץ שליט"א פון מאנסי, מיט די כלה א טאכטער פון הגה"צ ר' חיים מאיר פיש שליט"א, זון פון כ"ק אדמו"ר מביקסאד שליט"א, און איידעם ביי הגה"צ אבד"ק ראחמיסטריווקא מאנסי שליט"א. – די שמחת האויפרוף קומט פאר אין ביהמ"ד הגדול וויזניץ אין מאנסי.

דעם שבת קומט פאר די שמחת האויפרוף פון א אייניקל ביי כ"ק אדמו"ר מסטריזוב שליט"א, די חתן א זון פון בנו יחידו הגה"צ ר' לייבוש הורוויץ שליט"א, איידעם ביי הגה"צ ר' ירמי' טייטלבוים שליט"א, מיט די כלה א טאכטער פון הגה"צ ר' יואל מייזליש שליט"א רב ביהמ"ד ברך משה סיגוט אין קרית יואל, זון פון הגה"צ גאב"ד סאטמאר מאנטריאל שליט"א, און איידעם ביי כ"ק אדמו"ר מסוליצא שליט"א פון פאראקאוועי. – די שמחת האויפרוף קומט פאר אין ביהמ"ד סטריזוב אין בארא פארק.

דעם שבת קומט פאר די שמחת האויפרוף פון א אייניקל ביי כ"ק אדמו"ר מפרימישלאן שליט"א, די חתן א זון פון זיין איידעם הגה"צ ר' משה הלל שטערן שליט"א, זון פון הגה"צ אבד"ק ראחמיסטריווקא ב"ב שליט"א, מיט די כלה א טאכטער פון הגה"צ ר' ישראל האגער שליט"א, זון פון כ"ק אדמו"ר משאץ וויזניץ שליט"א, און איידעם ביי כ"ק אדמו"ר מליטשיק שליט"א. – די שמחת האויפרוף קומט פאר אין ביהמ"ד פרימישלאן אין בני ברק.

דעם שבת קומט פאר די שמחת האויפרוף פונעם חתן א זון פון הגה"צ ר' ישראל שנעעבאלג שליט"א אבד"ק טשערנאוויץ בארא פארק, זון פון כ"ק אדמו"ר מטשערנאוויץ שליט"א, און איידעם ביי הגה"צ בעל אור שלום מוויזניץ זצ"ל, מיט די כלה א טאכטער פון הרב הערשל ווייס שליט"א, זון פון הגה"צ ר' חיים אלעזר ווייס שליט"א אבד"ק חאמעלניק ליזענסק, און איידעם ביי כ"ק אדמו"ר מדזירקא שליט"א. – די שמחת האויפרוף קומט פאר אין זאל עטרת גאלדא אין בארא פארק. דער זיידע כ"ק אדמו"ר מטשערנאוויץ שליט"א איז צוגאסט אויף שבת אין בארא פארק לכבוד די שמחה, און וועט אפרעכטן די תפילות און טישן אין זאל פון תפארת גאלדא.

דעם שבת קומט פאר די שמחת האויפרוף פונעם חתן א זון פון הרב נחמן זילבער שליט"א, זון פון הגה"צ גאב"ד פריימאן שליט"א ראב"ד התאחדות הרבנים, און איידעם ביי כ"ק אדמו"ר מרודניק שליט"א, מיט די כלה א טאכטער פון הרב חיים שיק שליט"א, זון פון הגה"צ אבד"ק טאקאי זצ"ל, און איידעם ביי כ"ק אדמו"ר מנדבורנא ב"פ שליט"א. – די שמחת האויפרוף קומט פאר אין ביהמ"ד רודניק אין בארא פארק.

דעם שבת קומט פאר די שמחת האויפרוף פון א אייניקל ביי הגה''צ אבדק''ק אמרי יצחק שליט"א, די חתן א זון פון זיין איידעם הגה"צ ר' פישל ציגעלהיים שליט"א, מיט די כלה א טאכטער פון הגה"צ ר' ישראל שלום יוסף טווערסקי שליט"א אב''ד טריסק מאנסי, זון פון כ''ק אדמו''ר מטריסק לאנדאן שליט"א, און איידעם ביי הגה''צ ר' ארי' וואגשאהל שליט"א אב''ד ראדאמישלא. – די שמחת האויפרוף קומט פאר אין ביהמ"ד אמרי יצחק אין בארא פארק.

דעם שבת קומט פאר די שמחת השלום זכר פון א אור אייניקל ביי כ"ק אדמו"ר מגור שליט"א, אייניקל פון זיין איידעם הגה"צ ר' אברהם העניך זילבערשטיין שליט"א, בן הנולד ביי זיין איידעם הרב יהודה לייב לובלינג שליט"א. – כ"ק אדמו"ר מגור שליט"א וועט אפרעכטן א טיש פרייטאג צונאכטס לכבוד די שמחה, אין ביהמ"ד הגדול גור אין ירושלים.

כ"ק אדמו"ר מערלוי שליט"א איז צוגאסט אויף דעם שבת אין עיה"ק צפת, אינאיינעם מיט די גרעסערע תומכים פונעם רבינ'ס צדקה קאסע קמחא דפסחא צדקת רבי יוחנן, בבית האכסניא אין שטוב פון משפחת פישער שיחי'.

כ"ק אדמו"ר מדזיקוב וויזניץ שליט"א וועלכער איז צוגאסט די טעג אין ניו יארק לטובת די אויפבוי פון די נייע ביהמ"ד הגדול דזיקוב וויזניץ אין בית שמש, וועט פראווענען דעם שבת אין וויליאמסבורג אין ביהמ"ד הגדול דקהל תורת חיים וויזניץ, אינאיינעם מיט ש"ב כ"ק אדמו"ר מוויזניץ שליט"א פון וויליאמסבורג.

כ"ק אדמו"ר מלעלוב שליט"א איז צוגאסט אויף דעם שבת אין ליזענסק, סמוך ונראה צום ציון הק' פונעם הייליגן רבי'ן ר' אלימלך זי"ע.

כ"ק אדמו"ר מאלכסנדר שליט"א וועלכער איז צוגאסט די טעג אויף א מסע הקודש "הנאמנים" צו די קברי צדיקים אין פוילין, אינאיינעם מיט די נדיבים ותומכים פון די נייע ביהמ"ד הגדול אלכסנדר אין בני ברק, וועט פראווענען דעם שבת אין א פראכטפולע האטעל אין שטאט קראקא.

כ"ק אדמו"ר מתולדות צבי ספינקא שליט"א איז צוגאסט אויף דעם שבת אין לעיקוואד בקרב חסידיו, די תפילות און טישן קומען פאר בבית מדרשו בית אפרים פישל.

כ"ק אדמו"ר מתולדות יהודה סטוטשין שליט"א וועלכער איז צוגאסט די טעג אין ארץ ישראל לרגל די ימי השובבי"ם, וועט פראווענען דעם שבת בקרב חסידיו אין בני ברק, אין ביהמ"ד הגדול דחסידי מודזיץ אויף רחוב חבקוק.

כ"ק אדמו"ר מביאלא שליט"א וועלכער איז צוגאסט די טעג אין ניו יארק לטובת מוסדותיו הקדושים, וועט פראווענען דעם שבת אין לאורענס בבית האכסניא.

כ"ק הגה"צ גאב"ד יאוואזשנא שליט"א איז צוגאסט אויף דעם שבת אין קרית יואל בקרב חסידיו, די תפילות און טישן קומען פאר אין ביהמ"ד דרך החיים אויף ווען ביורען.

כ"ק אדמו"ר מאלכסנדר שליט"א וועלכער איז אנגעקומען אויף א מסע הקודש קיין פוילין, לרגל די הילולא קדישא פונעם הייליגן ישמח ישראל פון אלכסנדר זי"ע, וועט פראווענען דעם שבת אינעם בנין הכנסת אורחים אין שטאט אלכסנדר.

כ"ק אדמו"ר משומרי אמונים שליט"א איז צוגאסט אויף דעם שבת אין לאס אנדזשעלעס לטובת מוסדותיו הקדושים.

כ"ק אדמו"ר מקרעטשניף סיגעט שליט"א איז צוגאסט אויף דעם שבת אין קענווי איילענד אין ענגלאנד בקרב חסידיו, די תפילות און שלש סעודות קומט פאר אין היכל ישיבת מאור מנחם, און די טיש פרייטאג צונאכטס אין די צענטראלע ביהמ"ד אין שטאט, די אכסניא איז אין שטוב פון הרב החסיד ר' אברהם יהושע קרויס הי"ו.

כ"ק אדמו"ר ממבקשי אמונה שליט"א איז צוגאסט אויף דעם שבת אין רמות, די טיש פרייטאג צונאכטס קומט פאר אין זאל מאורות משה, און שלש סעודות אין ביהמ"ד דעעש.

כ"ק אדמו"ר מקאליב ארה"ק שליט"א וועלכער איז צוגאסט די טעג אין שיקאגא לטובת מוסדותיו הקדושים, וועט פראווענען דעם שבת אין די ארטיגע בתי מדרשים, פרייטאג צונאכטס אין ביהמ"ד עדת בני ישראל, תפילת שחרית שבת אינדערפרי אין ביהמ"ד חסד לאברהם זידטשויב, און שלש סעודות אין ביהמ"ד קהל חסידים.

הגה"צ ר' אהרן מרדכי רוקח שליט"א בנו יחידו פון כ"ק אדמו"ר מבעלזא שליט"א איז צוגאסט אויף דעם שבת בקרב חסידי בעלזא אין מאנטריאל, די תפילות, שבת אחים, און שלש סעודות, קומט פאר אין א ריזן שאטער וואס איז געווארן אויפגעשטעלט נעבן די בניני המוסדות אין שטאט.

הגה"צ אבד"ק סאטמאר וויליאמסבורג שליט"א בנו הגדול פון כ"ק אדמו"ר מסאטמאר שליט"א, איז צוגאסט אויף דעם שבת בקרב תלמידי המתיבתא אין קרית יואל ווי יאר יערליך אין די וואכן פון שובבי"ם, די תפילות וועט פארקומען אין היכל הישיבה סניף דברי יואל, און די סעודות שבת און של"ש אין היכל הישיבה סניף ויואל משה.

הגה"צ ר' חיים שלום האלבערשטאם שליט"א בנו הגדול פון כ"ק אדמו"ר מבאבוב שליט"א, איז צוגאסט אויף דעם שבת בקרב חסידי באבוב אין לאנדאן.

הגה"צ ר' מאיר גרינוואלד שליט"א דומ"ץ פאפא בנו הגדול פון כ"ק אדמו"ר מפאפא שליט"א וועט פראווענען דעם שבת א שבת התעלות והתאחדות מיט די צעירי האברכים בחצר הקודש פאפא, אין מחנה נייפעסט אין מאנטיסעלא.