מיט אן אומבאשרייבליכע צער איז אנגעקומען היינט די שרעקליכע בשורה, אז נאך עטליכע טעג פון העפטיגע זוכערייען איז הב' החשוב כמר משה לודמיר ע"ה ממצוייני ישיבת באיאן אין מודיעין עילית, געפונען געווארן ליידער נישט בין החיים, נאכן ווערן פארשוועמט אין א טייך מיט עטליכע טעג צוריק.
הב' החשוב משה לודמיר ע"ה זיבעצן יאר אלט, איז געווען א זון פון הרב החסיד ר' הערשל לודמיר הי"ו מחשובי חסידי באיאן אין ביתר, און פון די חשובע עסקנים בחצר הקודש באיאן, אן אייניקל פון הרב החסיד ר' דוד לודמיר ע"ה א גרויסער תומך תורה אין באיאן. אלס קינד האט ער געלערנט אין די באיאנער תלמוד תורה אין ביתר, און דערנאך אין די ישיבה קטנה אין ביתר, מיט עטליכע חדשים צוריק איז ער אריין לערנען אין ישיבה גדולה תפארת ישראל רוזין באיאן אין מודיעין עילית, וואו ער האט עוסק געווען בתורה מיט גרויס התמדה און געשטיגן מעלה מעלה בדרכי התורה והחסידות.
פארלאפענעם דינסטאג זייענדיג ביים טייך נחל מודיעין נעבן מודיעין עילית, איז ער ליידער פארשוועמט געווארן פון די שווערע פארפלייצונגען וואס האט געהערשט אין די ראיאן צוליב די שטורמישע וועטער, נאך א בחור וואס איז געווען דארט צוזאמען מיט אים איז מיט גרויס חסדי שמים געראטעוועט געווארן, אבער הב' משה איז ליידער אוועקגעשלעפט געווארן עטליכע מייל צוליב די שווערע פארפלייצונגען.
עטליכע טעג איז אנגעגאנגען העפטיגע זוכערייען דורך מערערע זוך גרופעס און עמערדזשענסי אגענטורן, און בהוראת הקודש פון כ"ק אדמו"ר מבאיאן שליט"א זענען הונדערטער חסידים ארויסגעגאנגען צום טייך ארויסצוהעלפן מיט די זוכעריי. היינט פרייטאג אינדערפרי האט מען אים אפגעפונען ליידער נישט בין החיים, גאנצע זעקס מייל ווייט פון די ארט וואו ער האט זיך געפונען דינסטאג נאכמיטאג.
די ביטערע טראגעדיע האט באטראפן די משפחה א קארגע וואך בעפאר די שמחת החתונה פון א קינד, אין די צייט וואס א אנדערע משפחה מיטגליד געפונט זיך אין אמעריקע אויף צרכי רפואה, די לוויה איז פארגעקומען היינט נאכמיטאג ביים בית הלוויות שמגר אין ירושלים, וואו כ"ק אדמו"ר מבאיאן שליט"א האט זיך פערזענליך באטייליגט בראש קהל חסידיו, דערנאך איז ער געקומען לקבורה אויפן הר המנוחות.
