א ביטערע טראגעדיע האט באטראפן די בעלזא קהילה אין בארא פארק און גאנץ כלל ישראל, ווען עס ווערט היינט באקאנט א טראגישע געשיכטע וואס האט זיך אפגעשפילט אינעם ווייטן קאלאמביע, אז א חשובער אינגערמאן מחסידי בעלזא אין בארא פארק איז אומגעברענגט געווארן דורך בארבארישע רויבער, זייענדיג צוגאסט אין קאלאמביע.
האברך ר' נחום ישראל עבער ע"ה איין און פופציג יאר אלט, איז געווען א זון פון הרב החסיד ר' מנחם מענדל עבער ע"ה מחשובי חסידי בעלזא אין מאנטריאל, וועמענס פיפטע יארצייט עס איז אויסגעפאלן דעם שבת ח' אייר, מצד אמו איז ער א אייניקל פון הרב החסיד ר' יצחק שלמה גרינוואלד ע"ה מחשובי חסידי בעלזא אין מאנטריאל.
ר' נחום האט געוואוינט אין בארא פארק וואו ער איז געווען א באקאנטער מתפלל אין די בעלזא שטיבלעך, ער איז געפארן קיין קאלאמביע פאר פארשידענע ביזנעס צוועקן, אבער ליידער איז ער פארשוואונדן געווארן עטליכע טעג צוריק, ווען מען האט מער נישט געהערט פון אים, און מען האט נישט געוואוסט וואו ער געפונט זיך.
אצינד נאך א העפטיגע זוכעריי האט מען אים געטראפן ליידער נישט בין החיים, און נאך א קורצע אויספארשונג איז קלאר געווארן אז ער איז ליידער געפאלן א קרבן צו א גרופע בארבארישע רויבער וואס האבן אים באגנב'ט און אים אומגעברענגט רח"ל. די עסקנים ארבעטן אצינד מיט די ארטיגע אויטאריטעטן צו באפרייען דעם נפטר לקבורה.
