א שוידערליכע טראגעדיע האט פאסירט היינט נאכמיטאג אינעם עיר התורה והחסידות בני ברק, ווען א חשובער אינגערמאן א תלמיד חכם איז געשטאכן געווארן צום טויט רח"ל, זייענדיג אין כולל חזון איש וואו ער האט דאן געלערנט מיט זיין איינציגן זון.
הרב הגאון ר' ישי פור ז"ל צוויי און פופציג יאר אלט, פון די חשובע לומדי ורבני הכולל, איז געזעסן אינעם היכל הכולל און עוסק געווען בתורה מיט זיין איינציגער זון, וואס ער האט זוכה געווען צו האלזן נאך אסאך יארן ווארטן אויף קינדער. אינמיטן לערנען איז א פארשוין צוגעקומען צו אים און אים געשטאכן רח"ל, א הויפט אדער איז געשעדיגט געווארן, און טראץ אלע באמיאונגען דורך די הצלה לייט און דאקטוירים אין די שיבא תל השומר שפיטאל, איז ר' ישי ליידער נפטר געווארן לחיי העולם הבא פון די שווערע וואונדן ה"י.
די שרעקליכע טראגעדיע האט אויפגעשאקלט די גאנצע שטאט, און בפרט די חשובע לומדים אין כולל חזון איש וואס איז פון די גרעסטע תורה פעסטונגען אינעם עיר התורה והחסידות בני ברק. די פאליציי ארבעט צו דערגיין די שפורן פון די פאראנטווארטליכע וועלכער האט באוויזן צו אנטלויפן פון די סצענע.
