תלמידי וחסידי סאטמאר האבן אויפגענומען מיט גרויס פרייד די באשטימונג פון א היסטארישע ווענדפונקט בקורות ימי סאטמאר, ווען אין די יעצטיגע טעג איז באשטעטיגט געווארן די דאטום און די ערשטע פלענער פאר די גרויסע מעמד "סיום הש"ס" וואס ווערט געלערנט דורך טויזענטער סאטמארער חסידים, אין ראם פון סדר "זכרו" וואס פאראייניגט סאטמארער חסידים אין א געמיינזאמע לימוד מדי יום ביומו.
איבער צוועלף יאר איז שוין פארביי פון ווען די סדר הלימוד איז געגרינדעט געווארן דורך כ"ק אדמו"ר מסאטמאר שליט"א, און האט אין די לעצטערע יארן פאראייניגט טויזענטער חסידים אויף א טעגליכע פארנעם, מיט נאכאנאנדע בחינות און שיעורי תורה וואס האט שטארק געהויבן דעם כח התורה אינערהאלב קהל יטב לב ד'סאטמאר.
שטייענדיג שוין נענטער ווי ווייטער צום גליקליכן מאמענט ווען די טויזענטער לומדים וועלן מסיים זיין גאנץ ש"ס, איז באשטעטיגט געווארן די ערשטע פלענער איבער די גרויסארטיגע חגיגה, וואס איז באשטימט אויף דעם פרייליכן טאג פון פורים קטן, זונטאג פרשת כי תשא י"ד אדר א' שנת תשפ"ז הבעל"ט, און די גענויע פלענער אין וועלכע זאל די חגיגה וועט פארקומען ווערן אצינד אויסגעארבעט דורך די טעטיגע עסקנים.
