היינט נאכמיטאג אין אר"י, בערך 6 אזייגער פארטאגס ניו יארקער צייט, האט זיך אנטפלעקט א שוידערליכע הארצרייסנדיגע טראגעדיע אינעם רוממה געגנט בירושלים קרתא דשפריא, ווען אין א היימישע פלעיגרופ האט מען געטראפן עטליכע קינדער ליידער באוואוסטלאז און אין א שווערע מצב ל"ע. רעטונגס הילף זענען באלד אלארמירט געווארן און אנגעקומען מיט שטארקע כוחות, אבער ליידער איז באשטעטיגט געווארן אז צוויי קינדער, ביידע 4 חדשים אלט, זענען ל"ע אומגעקומען אין א פארפעסטיגונג וואס מ'פארשט נאך אויס.
העכער פופציג קינדער זענען אריינגעפירט געווארן אין שפיטאל, טייל מיט געזונטהייט פראבלעמען אין רעזולטאט פון דער פארפעסטונג און דאס איבריגע פאר אונטערזוכונגען. די מצב אויפן ארט איז געווען הארצרייסנדיג ווען צענדליגער עלטערן זענען שנעל געקומען צום לאקאציע צו אויסגעפינען די מצב פון זייערע קינדער, ווען ביטערע בשורות זענען אריינגעקומען על שבר בת עמי, עיני עיני ירדה מים.
לויט ערשטע באריכטן איז די טראגעדיע געקומען פון א גאז פארפעסטיגונג צי קארבאן מאנאקסייד, אבער לויט די ערשטע אויספארשונגען האבן זיי נישט געטראפן קיין באווייז דערצו, און מען האט אנגעהויבן אריינקוקן איבער די עסן וואס די קינדער האבן געגעסן און די מילך וואס מען האט זיי געגעבן צופרי. דערווייל איז נאך די מצב זייער אומקלאר, און א העפטיגע אויספארשונג איז אונטערגענומען געווארן צו זען וואס דא האט פאסירט, סיי מיט די צוויי נפטרים וואס ווערן נאך געהאלטן אין אבו כביר פאר אונטערזוכונגען, און סיי מיט דריי איינגעשטעלטע אין די פלעיגרופ וואס זענען פארהאלטן געווארן פאר אויספארשונגען.
כלל ישראל טרעט אריין אינעם חודש פון ש'מרם ב'רכם ט'הרם מיט אזא שווערע בשורה פון אומשולדיגע ליכטיגע תינוקות שלא חטאו, און מען בעט שלא ישמע עוד שוד ושבר בגבולינו ומהיום והלאה זאל מען מבשר זיין בלויז בשורות טובות ישועות ונחמות, ובנה ירושלים עיר הקודש במהרה בימינו.
