די עולם החינוך אינעם עיר ואם בישראל בארא פארק באגריסט מיט גרויס פרייד די געוואלדיגע הרחבת גבולי הקדושה אינערהאלב די בארימטע מוסדות "בנות חי'", מיסודו פון הגה"צ המשגיח רבי משה וואלפסאן זצ"ל אבד"ק אמונת ישראל, מיטן אפקויף פון א גיגאנטישע געביידע אין בארא פארק צו פארברייטערן די גבולי הקדושה, צוצוברענגען הרחבת הדעת פאר די הונדערטער תלמידות בליעה"ר.
די מיידל שולע בנות חי' איז געגרינדעט געווארן מיט קארגע צען יאר צוריק, אבער איז בליץ שנעל אויסגעשטיגן אלס א ריכטיגע אכסניא פאר הונדערטער תלמידות פון ערליכע חסידישע שטיבער, וואס זוכן צו ערהאלטן א ריינע חסידישע חינוך על דרך ישראל סבא. מיט די נאכאנאנדע בליה און וואוקס אין די צאל תלמידות האט די הנהלת המוסדות אונטערגענומען א מאסיווע פראיעקט צו פארברייטערן די גבולי הקדושה, זעענדיג אז די יעצטיגע "מחזיקי" בנין המוסדות וועט נישט קענען דינען אלס לאנג טערמינינגע לעזונג.
אין די יעצטיגע טעג האט די הנהלת המוסדות אונטערגעשריבן קאנטראקט אויף א מולטי מיליאן דאללערדיגע פראיעקט, אפצוקויפן די גיגאנטישע כתר געביידע וואס געפונט זיך אויף די פערצנטע עוועניו ביי די אכט און דרייסיגסטע סטריט, וואו עס געפונט זיך די באקאנטע כתר דזשודעיקא געשעפט און נאך פילע אידישע ביזנעסער.
לויטן פלאן וועט די הנהלת המוסדות רענאווירן און איבערבויען די געביידע אין די קומענדיגע תקופה, מיטן האפענונג אז ביז א קורצע צייט וועט עס קענען פארוואנדלט ווערן אלס באקוועמע אכסניא פאר טויזענטער תלמידות, צענדליגע קלאס צימערן און עטליכע עס זאלן און נאך פארשידענע איינריכטונגען, א סך הכל פון נאנט צו הונדערט און צוואנציג טויזענט סקווער פיס, א פראיעקט וואס ציהט אריין אין צענדליגע מיליאנען דאללארן.
