פרייליכע נייעס ווערט געמאלדן היינט פאר תלמידי וחסידי סאטמאר, אז די הנהלה פון ישיבה קטנה תורה ויראה ד'סאטמאר אין קרית יואל, איז אריין אין קאנטראקט להרחיב גבולי הקדושה, אפצוקויפן א פרישן שטח אין די בלומינגראוו געגנט אין קרית יואל רבתי, וואו עס ווערן אויפגעבויעט א שפאגל נייע בנין פאר די ישיבה הקדושה.
דאס קומט נאך די נאכאנאנדע בליה און וואוקס אין די צאל תלמידים, ווען צו דעם שנת הלימודים איז געעפנט געווארן א פערטער סניף אין די ישיבה קטנה, וואס באדייט אז מען דארף נאך א לאקאציע אין צוגאב צו די עקזיסטירנדע בניני הישיבה, אויף די חברון גאס אין קרית יואל, און די נייע בניני הישיבה אין ניו ווינדסאר.
די נייע שטח אויף וואס מען איז נארוואס אריין אין קאנטראקט, געפונט זיך אויף די פראספעקט גאס אין בלומינגראוו, אין הארץ פון א ווירבלנדע געגנט וואס ווערט מער און מער באזעצט דורך היימישע אידן, מיט א צאל דעוועלאפמענטס וואס ווערן געבויעט להרחיב גבולי הקדושה.
