אין די יעצטיגע טעג איז באשטעטיגט געווארן אז כ"ק אדמו"ר מסאטמאר שליט"א וועט אין א ערשטמאליגע פארנעם פראווענען א שבת מיט די חשובע בחורים תלמידים פון די נייע מתיבתא תורה ויראה ד'סאטמאר, וואס איז דעם אנהייב יאר נתייסד געווארן אינעם עיר התורה והחסידות מאנסי, און איז זינט איר גרינדונג אויסגעשטיגן אלס א ריכטיגע מקום תורה וחסידות וואו די בחורים שטייגן בתורה וביראה.
די געהויבענע שבת וועט געפראוועט ווערן קומענדיגן פרשת קרח הבעל"ט, אין די סאטמארער ישיבה קעמפ מחנה דברי יואל אין סוואן לעיק, וואו דער רבי שליט"א וויילט יאר יערליך אין די זוממער וואכן אינאיינעם מיט די תלמידים פון ישיבה גדולה תורה ויראה ד'סאטמאר.
אויסער די שבת זעלבסט וועלן די בחורים פארברענגען מיטן רבי'ן פאר עטליכע טעג, ימי התעלות "בצל כנפיך", אנגעהויבן פון מיטוואך פרשת קרח ביז מאנטאג פרשת חוקת בלק, ווען די בחורים וועלן זיצן און הארעווען אין די קאנטרי בערג און נהנה זיין מזיו אורו פונעם רבי'ן שליט"א, וועלכער האט שוין אפגעראכטן עטליכע באזוכן בין כותלי הישיבה אין מאנסי, ועינו ולבו שם כל הימים.
