חסידי בעלזא זענען איינגעהילט אין רגשי שמחה והודאה מיט די הרחבת גבולי הקדושה, ווען אין די יעצטיגע טעג האט די הנהלה פון מוסדות בעלזא אין לעיקוואד אונטערגעשריבן קאנטראקט אויף א צוואנציג מיליאן דאללערדיגע מקח, אפצוקויפן א גרויסן שטח און בנינים אדירים פאר די בעלזא תלמוד תורה אין שטאט.
די נייע געביידע וואס געפונט זיך אויף 520 דזשעימס סטריט, איז ביז היינט געווען די אכסניא של תורה פאר די ראחמיסטריווקא תלמוד תורה "זכר יוחנן", בנשיאות כ"ק אדמו"ר מראחמיסטריווקא שליט"א פון לעיקוואד, און ווי באקאנט איז די ראחמיסטריווקא מוסדות אריין אין קאנטראקט עטליכע חדשים צוריק אפצוקויפן א גרויסן בנין אויף די פראספעקט גאס צו מרחיב זיין די גבולי הקדושה.
לויטן פלאן פון די בעלזא עסקנים, וועט מען הערליך רענאווירן די געביידעס און אהערשטעלן צענדליגע קלאס צימערן און אלע באדערפענישן פאר די בעלזא תלמוד תורה אין שטאט, צוצוברענגען גרויס הרחבת הדעת פאר די תלמידים אין חדר. די מקח איז צושטאנד געקומען בברכתו ובעידודו פונעם מנהיג העדה כ"ק אדמו"ר מבעלזא שליט"א, צום טיפן פרייד פון חסידי בעלזא תושבי העיר.
